U rasparadžeńnie «Našaj Nivy» trapiŭ list staršyni Respublikanskaj kalehii advakataŭ Viktara Čajčyca, jaki prapanuje advakatam vykazacca pa temie imaviernaha skaračeńnia ich ułasnych dachodaŭ.
Viktar Čajčyc. Fota Moka.by
Sam list u svaim telehram-kanale apublikavaŭ žurnalist Arciom Harbacevič.
Čajčyc pryvodzić u prykład pryncyp spłaty ŭnioskaŭ u nataryusaŭ: 40% z prybytku da 2000 rubloŭ i 90% z prybytku bolš za 9000 rubloŭ.
Jon prapanuje pierajści da padobnaj sistemy i inicyjavać źmieny ŭ adpaviednych zakonach.
Ciapier, naprykład, advakaty płociać fiksavanyja ŭnioski ŭ zaležnaści ad rehijona.
«Ni ab jakim pierahladzie havorka pakul nie idzie, havorka ab tym, kab daviedacca mierkavańnie advakataŭ pa kankretnych pytańniach. Kankretna budziem havaryć paśla 23 śniežnia», — skazaŭ «Našaj Nivie» Viktar Čajčyc.
Što dumajuć advakaty?
Varta skazać, što jany nie kamientujuć situacyju ad svajho imieni, bo nie chočuć publična krytykavać Čajčyca.
«Skažam, zarabiŭ ja 2400 rubloŭ: spačatku addam 40%, potym u FSAN niedzie 120 rubloŭ, potym padatak 13%, a ŭsio astatniaje mnie. Kamu ad hetych źmienaŭ budzie lepš?
Tut pytańnie, kudy pojduć hrošy — u advakataŭ ža niama fiksavanaha zarobku, sacyjalnyj harantyj u vyhladzie adpusknych ci apłaty balničnaha. Kali b hetyja hrošy išli tudy — moža być, kali na niešta inšaje — nu dyk treba tady i šukać, kamu heta vyhadna.
Kab maładomu advakatu zarabić, treba jeździć pa ŭsioj krainie i znachodzić klijenta, mianie voś čaściakom zanosić u inšyja vobłaści. I ja liču, što kali taki pryncyp prymuć, to heta ŭdaryć pa maładych advakatach», — skazaŭ «Našaj Nivie» advakat, jaki niekalki hod pracuje ŭ adnym z rajonnych centraŭ.
«Halinu napierad šturchajuć prafiesijanały, a adzin sa stymułaŭ raźvićcia prafiesijanałaŭ — vysoki zarobak. Inicyjatyva Čajčyca faktyčna ŭstaloŭvaje stol zarobku ŭ halinie ŭ $4500 [z kožnaha nastupnaha zaroblenaha rubla advakat pakinie sabie 10 kapiejek — Red.]. Heta prykładna $50 tysiač na hod. Mahčyma, mianie zakidajuć kamianiami, ale heta vielmi nizkaja stol — kali brać Maskvu, to heta zarobak daśviedčanaha jurysta, ale daloki ad maksimumu. Kali ŭ nas heta budzie maksimum dla ŭsich advakataŭ, uklučna z vopytnymi partniorami ź vielizarnym stažam, to mnohija z tych, chto mahli b ruchać halinu napierad, piarojduć na inšuju pracu. Abo pačnucca šeryja schiemy ź vialikimi rojałci i kaśmičnyja arendy ofisaŭ u afilavanych asob», — tłumačyć inšy juryst.
Adzin ź viadomych advakataŭ patłumačyŭ, što supolnaść reahuje na list Čajčyca vielmi niervova i ŭsprymaje heta jak sprobu dziaržavy pabudavać za košt advakataŭ budynak advakatury.
