Biełaruś i Rasija pracujuć nad vypracoŭkaj rašeńnia pa ŭrehulavańni situacyi ź BiełAES. Pra heta Alaksandr Łukašenka zajaviŭ siońnia na sustrečy z kalektyvam Śvietłahorskaha CKK, pieradaje BIEŁTA.
«Vy viedajecie, što rasijanie pavinny byli ŭ 2018 hodzie ŭvieści pieršy błok, u 2019-m — druhi. Ale sarvali terminy, a tam vielizarnyja štrafnyja sankcyi», — adznačyŭ Alaksandr Łukašenka.
Pavodle jaho słoŭ, u Sočy Uładzimir Pucin prapanavaŭ znajści ŭzajemaprymalnaje rašeńnie, kab nie pačynać pieramovy z sankcyj. Rasijski lidar taksama adznačyŭ, što dziaržaŭny biudžet nie hatovy da hetych vypłat.
«Ja kažu: dobraja prapanova, u mianie budzie sustrečnaja. Vy sarvali terminy, značyć, davajcie damovimsia, što pracent pa kredycie skarocim da taho ŭzroŭniu, jak vy budujecie ŭ Vienhryi, u Vjetnamie (dzieści kala 3%). My nie budziem uvodzić sankcyi, i heta jak raz toje na toje i pryjdziecca. I kredyt, kali vy terminy sarvali, my pačniem vypłačvać nie praz dva hady, a praź piać. Łahična? Łahična.
Niaŭtulna, niazručna, ale vyrašyli, što ŭ hetym płanie my budziem damaŭlacca: inšaha nie dadziena. Abo my ŭvodzim sankcyi za praterminoŭku (a tam vialikija hrošy), abo jany pasoŭvajucca pa kredycie. Heta całkam narmalna», — ličyć Alaksandr Łukašenka.
Jon dadaŭ, što adkidańnia hetaj prapanovy ŭ rasijskaha prezidenta nie było.
