Takuju dumku vykazaŭ hałoŭny redaktar «Echa Maskvy» Alaksiej Vieniadziktaŭ u prahramie «Osoboje mnienije», kamientujučy vizit kiraŭnika «Rasnafty» Ihara Siečyna ŭ Minsk.
«Napiaredadni Siečyn sustrakaŭsia z Pucinym. Heta aznačaje, što Siečyn atrymaŭ daručeńnie. My viedajem, što hałoŭnym publičnym apieracyjnym pytańniem źjaŭlajucca pastaŭki nafty ŭ Respubliku Biełaruś, — skazaŭ Vieniadziktaŭ.
— Napiaredadni kiraŭnik «Rasnafty», jakaja pastaŭlała ŭ minułym hodzie 50% usioj nafty, što išła ŭ Biełaruś, sustrakajecca z prezidentam RF, potym siadaje ŭ samalot i lacić da Alaksandra Łukašenki. Vidavočna daručeńnie. (…) Jon jamu pavioz toje rašeńnie, što Pucin paśla sustrečy z Łukašenkam [u Sočy] pryniaŭ.
Jon jamu pryvioz rašeńnie Pucina. I my siońnia, zaŭtra daviedajemsia, jakoje rašeńnie Pucina ŭ adnosinach da Biełarusi i da naftavaha pytańnia. Nijakaha niama Siečyna, heta moža być Siečyn abo Mlečyn.
Kamu budzie daručeńnie, toj ź im i pajedzie».
Sustreča Łukašenki i Siečyna prajšła 18 lutaha, ale padrabiaznaściaŭ niama.
Maskva i Minsk nie damovilisia ab umovach pastaŭki nafty ŭ Biełaruś u 2020 hodzie. U vyniku ŭ studzieni-lutym naftu ŭ Biełaruś pastaŭlali tolki kampanii Michaiła Huceryjeva, jakoha źviazvajuć siabroŭskija adnosiny z Alaksandram Łukašenkam.
Zhodna ź indykatyŭnym bałansam, Rasija moža pastavić u Biełaruś 24 młn ton nafty, heta značyć 2 młn u miesiac. U studzieni było pastaŭlena 500 tysiač ton. Tamu, skazaŭ Łukašenka, kali z Rasii nie budzie pastaŭlena nafta ŭ patrebnych abjomach, Biełaruś moža pačać adbor nafty z tranzitnaj «truby».
