Žychar Bresta asudžany na piać hadoŭ pazbaŭleńnia voli za niezakonnaje zachoŭvańnie i pieravozku praź miažu narkotyku. Pry pierasiačeńni miažy ŭ mužčyny znajšli kakain masaj 0,0148 h. Pry praviadzieńni ekśpiertyzy narkotyk byŭ całkam zraschodavany, h. zn. uciahnuć jaho ŭ niezakonny abarot praktyčna niemahčyma. Prakuror prasiŭ źmiakčyć pakarańnie, ale sud pakinuŭ prysud bieź źmieny, piša Tut.by.
U abvinavačvańni fihuruje dva artykuły — niezakonnaje zachoŭvańnie narkotyku, biez mety zbytu — za heta bieraściejec atrymaŭ 2 hady pazbaŭleńnia voli (č.1 art. 328 KK); i niezakonnaja pieravozka asabliva niebiaśpiečnaha narkotyku praź miažu — za heta sud pryznačyŭ jamu 5 hadoŭ pazbaŭleńnia voli, i heta minimalny termin, pavodle sankcyi artykuła (č.2 art. 328-1 KK). Pa sukupnaści złačynstvaŭ kančatkova pryznačana 5 hadoŭ pazbaŭleńnia voli.
Dziaržabvinavaŭca padaŭ pratest na prysud u suviazi sa strohaściu pakarańnia za pieravozku kakainu. Prakuror adznačaŭ, što narkotyk byŭ całkam zraschodavany pry praviadzieńni ekśpiertnych daśledavańniaŭ, heta značyć uciahnuć jaho ŭ niezakonny abarot było praktyčna niemahčyma. Pry praviadzieńni ahladu mužčyna nie chavaŭ ad mytnikaŭ narkotyk, pakiecik z kakainam znajšli ŭ padłakotniku ŭ sałonie aŭtamabila. Raniej asudžany da kryminalnaj adkaznaści nie pryciahvaŭsia, pryznaŭ vinu i raskajaŭsia ŭ zroblenym. Na ŭtrymańni ŭ mužčyny — dvoje maleńkich dziaciej i stareńkaja maci. Abciažvalnych abstavin pa spravie nie ŭstanoŭlena. U suviazi z hetym dziaržabvinavaŭca prasiŭ pryznać vyklučnyja akaličnaści pa spravie i kančatkova pryznačyć pakarańnie ŭ vyhladzie 2,5 hadoŭ pazbaŭleńnia voli.
Viarchoŭny sud pryjšoŭ da vysnovy, što pratest nie padlahaje zadavalnieńniu, pakarańnie zastałosia raniejšym — 5 hadoŭ pazbaŭleńnia voli. Važna — u Biełarusi niama minimalnaha abjomu narkatyčnaha srodku, ź jakoha nastupaje kryminalnaja adkaznaść za niezakonnyja dziejańni ź im, heta značyć navat niaznačny, jak u dadzienym vypadku, abjom źjaŭlajecca padstavaj raspačać kryminalnuju spravu i pryciahnuć da adkaznaści parušalnika.
