Dziŭnaja historyja adbyłasia z hrodziencam Jaŭhienam, jaki ŭ kancy 2019 hoda dapamahaŭ rabić ramont u adnoj z novych trenažornych załaŭ horada. Mužčyna śćviardžaje, što paśla taho, jak jon pryjšoŭ da administracyi za apłataj, jaho mocna źbili, a paśla vystavili vymahalnikam. U vyniku ŭ hrodzienca złamany nos i jość prablemy z vokam. Jon źviarnuŭsia pa dapamohu ŭ milicyju, piša Hrodna.life.

U trenažornaj zale Jaŭhien słaŭ kaŭralin. Za pracu jamu pavinny byli vypłacić kala 600 dołaraŭ. Častku jamu addali, a astatniaje abiacali vypłacić paźniej. 22 lutaha mužčyna stelefanavaŭsia z administracyjaj i damoviŭsia pryjści ŭ zału.

«Kali ja pryjšoŭ čarhovy raz spytać pra hrošy, adzin z trenieraŭ zały Artur padbieh ź niejkimi pretenzijami. Słova za słova, prapanavaŭ vyjści pahavaryć. Ja admoviŭsia, tady jon udaryŭ mianie rukoj pa tvary, ja ŭpaŭ i jon udaryŭ mianie nahoj. U vyniku ŭ mianie złamany nos i paškodžana voka. I ciapier hetyja ludzi sprabujuć vystavić mianie vymahalnikam, zapałochvajuć majho śviedku. Kažuć, što ja im pahražaŭ. Ale z majho boku nie było nijakich pahroz, ja pryjšoŭ za svaimi sumlenna zaroblenymi hrašyma. Hetyja ludzi prosta chočuć syści ad adkaznaści, ale ja ŭ mianie jość usie zapisy razmoŭ», — raspavioŭ Jaŭhien.

Jaŭhien płanuje pakarać kryŭdzicielaŭ i atrymać ad ich kampiensacyju za pryčynienuju zdaroŭju škodu. Administracyja trenažornaj zały maje zusim inšuju viersiju taho, što adbyłosia ź Jaŭhienam.

«Tak, jon u nas pracavaŭ. Zastalisia pavinny jamu kala 170 dołaraŭ. Hatovyja byli jamu pieradać hetuju sumu, ale jon nie padymaŭ trubku, — raspaviadaje pradstaŭnik trenažornaj zały Viktar. — U vyniku jon pryjšoŭ sam da nas u zału, pry hetym byŭ pjany. Zajšoŭ u zału, potym pajšoŭ. I kala zały nakinuŭsia na našaha treniera Artura, jaki išoŭ na treniroŭku. Artur vyviernuŭsia, toj upaŭ i ŭdaryŭsia tvaram ab asfalt. Ja asabista jamu davaŭ ručnik i akazvaŭ dapamohu.

Ciapier hety čałaviek śćviardžaje, što jaho źbiŭ naš trenier. Jość śviedki ŭ trenažornaj zale, jakija bačyli, jak usio adbyłosia, i jany hatovyja paćvierdzić maje słovy. Ciapier hety čałaviek prosić 1500-2000 dołaraŭ na lačeńnie. Heta narmalna? A nahavaryć možna ŭsio što zaŭhodna».

Viadoma, što kamiery videanazirańnia ŭ momant incydentu ŭ trenažornaj zale nie pracavali. Milicyja raźbirajecca ŭ situacyi.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?