Jašče ŭ 2017 hodzie staršyniu Minskaha rajonnaha suda Alaksandra Chavanskaha źniali z pasady za ŭčynak, niesumiaščalny ź dziaržsłužbaj. Namieśnik staršyni Viarchoŭnaha suda kakietliva nazvaŭ heta «parušeńniem finansavaj dyscypliny».
Ciapier Chavanski na łavie padsudnych. Jaho vinavaciać u kradziažy šlacham złoŭžyvańnia słužbovymi paŭnamoctvami — były sudździa moža sieści na 10 hadoŭ.
Pasiadžeńnie idzie ŭ Viarchoŭnym sudzie.
Chavanski nie pad vartaj. Kali ŭvajšoŭ u zału suda, pačaŭ hučna aburacca tym, što jaho zdymajuć, i zakryvać tvar tečkaj dla papier.
Cikava, što eks-sudździa admoviŭsia ad advakataŭ, vyrašyŭ abaraniać siabie samastojna. Pryčym, padkreśliŭ Chavanski, heta nie źviazana z materyjalnaj situacyjaj.
Spačatku jon chacieŭ, kab jaho abaraniała žonka, ale jaje, pa słovach Chavanskaha, «niezakonna adchilili ad pracesu».
Uradženiec Baranavič, 54-hadovy Chavanski za svaju kar`ieru pracavaŭ u Puchavičach, Marjinaj Horcy, uznačalvaŭ sud Puchavickaha rajona. Z 2009 hoda — staršynia suda Minskaha rajona. U 2016 hodzie — vyzvaleny ad pasady. Z taho ž 2016 hoda i pa siońnia eks-sudździa pracuje pamočnikam staršyni praŭleńnia RRB banka.
U Minsku žyvie jaho dačka, padkreśliŭ eks-sudździa, sam jon žyłpłoščy ŭ stalicy nie maje.
«Žyŭ u słužbovaj kvatery, paśla jaje vyzvaliŭ. Maju tolki žyllo ŭ Marjinaj Horcy, jakoje nabyŭ jašče ŭ 1995 hodzie», — skazaŭ Chavanski.
Praces pieranieśli užo praz hadzinu paśla pačatku pasiadžeńnia. Spačatku Chavanski ahučvaŭ pretenzii i chadajnictvy: kazaŭ pra niajakasnyja dziejańni śledčych, pra śviedku, jakaja kazała, što Chavanski dapamoh uładkavacca na pracu niejkamu M., ale hetyja pakazańni paźniej byli abvierhnutyja.
«A na vočnaj staŭcy jana pryznałasia, što ahavaryła mianie!», — aburaŭsia eks-sudździa. Pa jaho słovach, paśla na hetuju śviedku navat zaviali kryminalnuju spravu za machlarstva, ale trochi paźniej spravu zakryli.
Taksama Chavanski źviarnuŭ uvahu na nadta ŭžo pilnuju pravierku. «Padčas pravierki dajšli da dziedavaj ziamli», kazaŭ były sudździa, pa jaho słovach, śledstva navat cikaviłasia vypłatami jaho svajakam, jakija tym vydali jak viaźniam kancłahieraŭ.
Paśla vystupu abvinavačvanaha, prakuror paprasiŭ dać jamu bolš času na padrychtoŭku da pracesu. Sud prysłuchaŭsia i abviaściŭ pierapynak da 10 sakavika.
