Fota Nadziei Bužan
Usie, chto zachvareŭ na karanavirus, znachodziacca ŭ zdavalniajučym stanie, majuć praktyčna bieśsimptomnaje raźvićcio zachvorvańnia. Pra heta padčas sumiesnaha bryfinhu ŭ MZS zajaviła namieśnik ministra achovy zdaroŭja Natalla Žukava, piša Tut.by.
Pradstaŭnik Ministerstva achovy zdaroŭja padkreśliła, što previentyŭnyja miery dapamahajuć strymlivać raspaŭsiud virusa.
— Try čałavieki ź siamji studenta ź Irana nie mahli raspaŭsiudžvać infiekcyju pa miescy pracy i žycharstva. U adnaho z kantaktujučych virus byŭ vyjaŭleny ŭžo na nastupny dzień, u astatnich — nie. Heta značyć, my praduchilili raspaŭsiudžvańnie virusa, — skazała Žukava.
Na siońnia ŭ Ministerstvie achovy zdaroŭja na kantroli pa karanavirusie znachodziacca 14,5 tysiač čałaviek — heta tyja, chto albo znachodziŭsia ŭ asiarodździ tych, chto zachvareŭ, albo prybyŭ z krain, dzie vyjavili uspyški karanavirusa.
«Ludzi ŭsio tak ža prylatajuć, pryjazdžajuć, laciać i źjazdžajuć. Pravierka — praces pastajanny, i kazać, što hetaja ličba kančatkovaja ci vynikovaja — nielha», — udakładniŭ słovy Natalli Žukavaj tielehram-kanał Ministerstva achovy zdaroŭja.
Žukava taksama padkreśliła, što Ministerstva achovy zdaroŭja nie płanuje prapanoŭvać zakryvać miežy i spyniać mižnarodnyja kantakty. Adzinaja miera, jakuju vyrašyli raspačać, — pieranieści masavyja mierapryjemstvy ŭ krainie na bolš poźnija daty.
U MZS na bryfinh zaprasili pradstaŭnikoŭ dypkorpusa, akredytavanych u Biełarusi, kab davieści da ich aktualnuju infarmacyju pra situacyju z karanavirusam u Biełarusi.
Namieśnik kiraŭnika MZS Andrej Dapkiunas raspavioŭ, što niekalki dzion tamu ŭ MZS była stvorana rabočaja hrupa pa praduchileńni raspaŭsiudžvańnia karanavirusa. Uznačaliŭ hrupu namieśnik ministra Dapkiunas. U Słužbie dziaržpratakołu taksama stvorana kaardynacyjnaja hrupa, jakaja budzie pracavać kruhłasutačna, kab być na suviazi z pasolstvami, jakija pracujuć u Biełarusi.
Nahadajem, na siaredzinu dnia 4 sakavika ŭ Biełarusi zarehistravana šeść vypadkaŭ karanavirusa. Čatyry — u Minsku, dva — u Viciebskaj vobłaści.
