Haradok u Viciebskaj vobłaści stanie pieršym horadam, kudy zavitajuć udzielniki prajmieryz ad apazicyjnych palityčnych siłaŭ. Siarod kandydataŭ Juraś Hubarevič (Ruch «Za Svabodu»), Pavieł Sieviaryniec (BCHD), Mikałaj Kazłoŭ (AHP), Alaksiej Janukievič (Partyja BNF) i Volha Kavalkova (BCHD, ale idzie sama pa sabie ). Napiaredadni «NN» padrychtavała nievialiki hajd pa prajmieryz z karotkimi pytańniami i adkazami.
Prajmieryz — heta pracedura pa vyznačeńni adzinaha kandydata, jaki pradstavić apazicyjnyja siły na prezidenckich vybarach. Piać palityčnych siłaŭ pahadzilisia, što padtrymajuć taho, chto stanie pieramožcam prajmieryz.
1. Kolki razoŭ ja zmahu prahałasavać?
Dvojčy. Adzin raz asabista padčas sustrečy z apazicyjnymi lidarami ŭ haradach Biełarusi. Druhi raz — u internet-hałasavancy.
2. Jak mnie ŭziać udzieł u sustrečach?
Sačyć za abviestkami na sajtach partyj, u sacsietkach kandydataŭ, a taksama ŭ niedziaržaŭnych ŚMI. Tam budzie padadzieny śpis haradoŭ, kudy kandydaty pryjeduć na sustrečy, a taksama miesca i čas tych sustreč. Prynaležnaść da niejkaj palityčnaj siły zusim nie abaviazkovaja. Ahułam płanujucca sustrečy ŭ 56 haradach i miastečkach krainy.
3. Što mnie treba mieć z saboj, kab prahałasavać?
Pažadana mieć pašpart. Kali pašpartu nie budzie z saboj, to vaźmicie chacia b vajskovy bilet, pravy kiroŭcy ci studenckaje paśviedčańnie. Biez dakumientaŭ da hałasavańnia vas nie dapuściać.
4. Kali maje pašpartnyja źviestki zapišuć, to heta značyć, što ja aŭtamatam traplu ŭ inicyjatyŭnuju hrupu adzinaha kandydata?
Mahčyma, vam paśla patelefanujuć i spytajucca, ci hatovyja vy pracavać na adzinaha kandydata. Ale biez vašaj zhody ni ŭ jakija hrupy vas nichto nie zapiša.
5. Kali ŭ moj horad udzielniki prajmieryz nie pryjeduć, što mnie rabić?
Brać udzieł u internet-hałasavańni.
Padčas pieršaj pajezdki apazicyjanieraŭ pa Viciebskaj vobłaści hałasavać zmohuć tolki žychary tych haradoŭ i rajonaŭ, dzie pravodziacca sustrečy. Robicca heta dla taho, kab kandydaty nie pryvozili z saboj hrupy padtrymki.
Ale, mahčyma, paźniej arhanizatary dapuściać da hałasavańnia žycharoŭ blizkich haradoŭ.
6. Ci buduć sustrečy ŭ Minsku?
Buduć, pryčym try. Adna adbudziecca napiaredadni Dnia Voli, druhaja — pierad Čarnobylskim šlacham, a treciaja — u siaredzinie maja.
7. Hałasy buduć ličyć pa «amierykanskaj» schiemie, kali kožny rehijon maje peŭnuju kolkaść hałasoŭ?
Nie, hałasy buduć ličycca ŭ absalutnaj kolkaści. Hałasy za kožnaha z kandydataŭ va ŭsich haradach padsumujuć. I ŭžo ad ahulnaj kolkaści hałasoŭ budzie vyličvacca pracent kožnaha z kandydataŭ.
8. Hałasavańnie pa kožnym z haradoŭ buduć abviaščać asobna?
Tak, pra kožny horad budzie viadoma adrazu.
9. Jak ja zmahu prahałasavać u internecie?
Dla hetaha na śpiecyjalnym sajcie treba budzie ŭvieści biełaruski mabilny numar. Na jaho pryjdzie sms-paviedamleńnie dla ŭdziełu ŭ hałasavańni. U pieršym hałasavańni, jakoje i budzie ŭličvacca arhanizatarami, budzie ŭsiaho tolki adzin hołas «za».
Budzie i druhoje hałasavańnie, «rejtynhavaje». U im možna budzie addać dva hałasy «za» i adzin hołas «suprać», ale jano nie pojdzie ŭ zalik.
Chutčej za ŭsio, sajt zapracuje ŭ siaredzinie sakavika. Arhanizatary raźličvajuć na 100 tysiač hałasoŭ.
10. Ci zmahu ja pierahałasavać, kali pieradumaju?
Tak, zmožacie. Kali ciaham kampanii vam bolš spadabajecca inšy kandydat, to ŭ internet-hałasavańni vy zmožacie źmianić hołas, dla hetaha vam patrebna budzie paŭtaryć praceduru z sms-paviedamleńniem.
