13-hadovy školnik Kałum Meninh z horada Saŭt-Šyłds na paŭnočnym uschodzie Anhlii vielmi lubić čytać. Jon zavioŭ sabie instahram-akaŭnt, u jakim piša mini-ahlady na pračytanyja knihi — u tym liku, na ramany Džejn Ościn, Džordža Orueła i Fiodara Dastajeŭskaha, a taksama na zvyšpapularnyja epapiei «Hary Poter» i «Pieśnia lodu i ahniu», paviedamlaje BBC.
Niahledziačy na vidavočnuju biaskryŭdnaść jaho staronki, jamu dastałosia ad adnakłaśnikaŭ u novaj škole, kudy jon niadaŭna pierajšoŭ. Školniki stali ckavać jaho ŭ zakrytym čacie, u jakim Kałum moh tolki čytać paviedamleńni, ale nie ŭdzielničać u dyskusii.
Na abaronu Kałuma stała jaho starejšaja siastra — u vychadnyja jana napisała tvit padtrymki, paśla čaho chłopčyku stali słać słovy padtrymki viadomyja ludzi, u tym liku aŭtary, čyje knihi juny Meninh tak lubić čytać.
24-hadovaja siastra školnika Elis Łandret źniervavałasia, što jaje brata zatrolili.
Jaje tvit chutka staŭ virusnym i pryciahnuŭ uvahu bukinistaŭ, piśmieńnikaŭ i knihahandlaroŭ.
Maci Kałuma Karła Łandret skazała, što jaje syn byŭ vielmi zasmučany, čytajučy paviedamleńni ŭ školnym čacie, ale słovy ad viadomych ludziej vielmi jamu dapamahli.
Za niekalki dzion kolkaść padpisčykaŭ akaŭnta Kałuma ŭźlacieła z 39 čałaviek da 328 tysiač.
