Češskija i słavackija ŭłady ŭ paniadziełak pryniali dadatkovyja zachady pa spynieńni raspaŭsiudu novaha typu karanavirusa na terytoryi hetych respublik. U Čechii palicyja pačała vybaračna mierać tempieraturu ŭ aŭtamabilistaŭ, što ŭjazdžajuć na terytoryju krainy. U Słavakii začyniajucca škoły, jaśli i dziciačyja sady, piša TASS.
«Dziaržaŭnaja rada biaśpieki [Čechii] z aŭtorka pastanaviła ŭvieści karancin u balnicach i damach sastarełych. Najbolšaja ryzyka zaražeńnia karanavirusam isnuje ŭ pažyłych ludziej i pakutujučych na chraničnyja chvaroby», — paviedamiŭ žurnalistam ministr achovy zdaroŭja Čechii Adam Vojciech.
Pavodle jaho słoŭ, u respublicy vyjaŭlena 32 infikavanych. Bolšaść ź ich niadaŭna viarnulisia ź Italii. Bolš za 1 100 hramadzian, jakija znachodzilisia ŭ kantakcie z zaražanymi, źmieščanyja ŭ dvuchtydniovy chatni karancin. Parušalnikam režymu strohaha karancinu pahražaje štraf da 3 młn kron (prykładna €20 tys.).
U Słavakii ŭ paniadziełak karanavirus byŭ vyjaŭleny ŭ vychavalnicy adnaho ź dziciačych sadkoŭ u Bracisłavie. Kolkaść infikavanych u respublicy, jak infarmavała Słavackaje radyjo, uzrasła da šaści čałaviek. Uładami abmiarkoŭvajecca pytańnie ab časovaj zabaronie kamandzirovak dziaržsłužačych za miažu.
U Bracisłavie i inšych słavackich haradach začynieny ci začyniajucca na termin nie mienš za dva tydni jaśli, dziciačyja sady i škoły. Takaja miera pryniata, u pryvatnaści, u staličnych rajonach Ružynaŭ i Stary-Horad. Na minułym tydni byli spynienyja zaniatki ŭ adnoj sa škoł horada Małacki, raźmieščanaha za 25 km na zachad ad Bracisłavy.
