Siońnia praz punkt propusku «Urbany» ŭ Brasłaŭskim rajonie viarnulisia na radzimu 140 biełaruskich dziaciej, jakija adpačyvali ŭ Jurmale ŭ sanatoryi «Biełaruś», paviedamlaje BiełTA.
Paśla rašeńnia Łatvii admianić mižnarodnyja pieravozki pasažyraŭ (u tym liku aŭtobusami) pytańnie viartańnia dziaciej vyrašali MZS i Mintrans. Try aŭtobusy ź biełaruskimi numarami ŭčora ŭpuścili na terytoryju Łatvii, siońnia jany viarnulisia. Biełaruskija pamiežniki va ŭzajemadziejańni z łatvijskimi kalehami apieratyŭna aformili 140 dziaciej, jakija pajeduć u Homiel.
Usie školniki prajšli nieabchodny sanitarna-karancinny kantrol. Pa Biełarusi ich buduć supravadžać supracoŭniki Dziaržaŭtainśpiekcyi.
Taksama siońnia nočču pierasiakuć biełaruska-łatvijskuju miažu 24 hramadzianiny Izraila, jakija nie mahli vyjechać z Łatvii. Ich pieraviazuć u Minsk, kab sa stalicy jany vylecieli dadomu.
