U Biełarusi padrychtavany prajekt ukaza, jaki praduhledžvaje mahčymaść adterminoŭki pa vypłacie arendnaj płaty, a taksama maratoryj na pavieličeńnie bazavaj arendnaj vieličyni i arendnaj płaty, paviedamlaje Dziaržaŭny kamitet pa majomaści.
Dakumient raspracavany Dziaržkammajomaściu dla akazańnia padtrymki subjektam pradprymalnictva, čyja dziejnaść moža najbolš paciarpieć ad epidemijałahičnaj situacyi (turystyčnyja i transpartnyja pasłuhi, haściničny i sanatorny biznes, hramadskaje charčavańnie, bytavyja pasłuhi i inš.).
Normy ŭkaza buduć raspaŭsiudžany na arandataraŭ (pazykaatrymalnikaŭ) nieruchomaj majomaści, jakaja znachodzicca ŭ dziaržułasnaści, a taksama va ŭłasnaści haspadarčych tavarystvaŭ, u statutnych fondach jakich bolš za 50% akcyj (dolej) znachodzicca va ŭłasnaści Biełarusi i (abo) jaje administracyjna-terytaryjalnych adzinak.
U pryvatnaści, prajektam ukaza praduhledžvajecca davańnie pa zajavie arandatara da 30 vieraśnia 2020 hoda adterminoŭki pa arendnaj płacie za karystańnie nieruchomaj majomaściu (kampiensacyi raschodaŭ, źviazanych ź jaje ŭtrymańniem i ekspłuatacyjaj).
Arendadaŭcam (pazykadavalnikam) nieruchomaj majomaści pry davańni arandataram takoj adterminoŭki taksama prapanujecca ŭstanavić adterminoŭku pa arendnaj płacie za ziamlu, padatku na ziamlu i na nieruchomaść z rasterminoŭkaj pa 31 śniežnia 2020 hoda.
Maratoryj na pavieličeńnie bazavaj arendnaj vieličyni i arendnaj płaty prajektam ukaza praduhledžvajecca na termin da 30 vieraśnia 2020 hoda.
Akramia taho, dziaržaŭnym jurydyčnym asobam prapanujecca dać prava davać pakupnikam, jakija ažyćciaŭlajuć takija «ŭraźlivyja» vidy dziejnaści, a taksama jakija akazvajuć bytavyja pasłuhi nasielnictvu, da 30 vieraśnia 2020 hoda adterminoŭku pa apłacie dziaržmajomaści, pradadzienaj z rasterminoŭkaj.
Adterminoŭka dajecca pakupniku na termin, paznačany ŭ jaho zajavie. Pahašeńnie pakupnikom sumy adterminoŭki pravodzicca štomiesiac roŭnymi dolami z 1 kastryčnika pa 31 śniežnia 2020 hoda. Pracenty za karystańnie adterminoŭkaj i rasterminoŭkaj prapanujecca nie naličvać.
