«Pačynałasia ŭsio z tempieratury. Vyklikali chutkuju, jany ŭkałoli «trajčatku» i źjechali, — raskazała «Našaj Nivie» Edyta, dačka biznesmiena Alaksandra Lachoviča. — Tady baćka z mamaj sami pajechali ŭ Miadzieł na renthien. Pieršy raz usio było narmalna. Praz tydzień pajechali znoŭ: u mamy dyjahnastavali branchit, a ŭ baćki — pnieŭmaniju».

Praź niekalki dzion paśla špitalizacyi Lachoviča pieraviali «na kisłarod», jašče praz paru dzion pakłali ŭ reanimacyju. Tam uviali ŭ stan štučnaj komy i padklučyli da aparata vientylacyi lohkich. Pad im jon pralažaŭ 13 dzion.

Svajaki kinuli zaklik pa miedyja i sacsietkach: šukali donaraŭ płazmy, jakija ŭžo pierachvareli «karonaj». Na toj momant mužčyna ŭžo lažaŭ na štučnaj vientylacyi lohkich.

Ale vyratavać Lachoviča nie ŭdałosia. 10 maja jon pamior u miadzielskaj balnicy.

Alaksandr žyŭ u miastečku Śvir, što staić nad adnajmiennym vozieram. Zajmaŭsia biznesam, mieŭ u Śviry sietku kramaŭ, jakaja handlavała chatnimi tavarami. Jamu było 53 hady.

«U reanimacyi baćku zrabili test na karanavirus, jon byŭ admoŭny. Ale viedaju, što pryjazdžali prafiesary ź Minska, kazali, što ŭ jaho simptomy «karony», i lačyli jaho jak ad «karony», — kaža dačka. — Ale ŭ baćki pierastali pracavać nyrki, a paśla nie vytryvała serca. Jon pamior 10 maja».

Paśla cieła advieźli ŭ Baraŭlany, tam buduć uskryvać i tady skažuć dakładna, ci byŭ karanavirus.

Dačka Alaksandra kaža, što ŭ jaje ci jaje mamy nichto analiz na karanavirus nie braŭ.

«U nas u Śviry ciažkaja situacyja ŭvohule. Tut stolki pnieŭmanij, a ŭ nas navat renthiena niama. Ludzi jeździać u Miadzieł, tam im robiać zdymak, staviać pnieŭmaniju i adpraŭlajuć lačycca dadomu. Testaŭ na karanavirus nijakich nie robiać», — kaža Edyta.

Клас
0
Панылы сорам
0
Ха-ха
0
Ого
0
Сумна
0
Абуральна
0