Vyvučajučy hiennyja mutacyi ŭ ryb, navukoŭcy vyjavili fiermient, jaki stymuluje ich seksualnyja funkcyi, pracujučy jak pałavy harmon. Adkryćcio moža pryvieści da stvareńnia novych mietadaŭ lačeńnia biaspłodździa ŭ ludziej. Vyniki daśledavańnia apublikavanyja ŭ časopisie Proceedings of National Academy of Sciences, piša ria.ru.

Kanadskija bijołahi z Ataŭskaha ŭniviersiteta razam ź ich kalehami ź Instytuta hidrabijałohii Kitajskaj akademii navuk, pravodzili ekśpierymienty pa redahavańni hienaŭ u rybak dania, nazirajučy, jak hiennyja mutacyi adbivajucca na pałavoj funkcyi rybak i ŭzajemadziejańni samcoŭ i samak padčas sparvańnia.

Navukoŭcy zaŭvažyli, što źmianieńnie z dapamohaj śpiecyfičnaj mutacyi hienaŭ pieptyda sakretahranina-2 pryvodziła da taho, što samcy pierastavali źviartać uvahu na samak i nie apładniali vykidanuju samkami ikru. Pry hetym ryby vyhladali absalutna zdarovymi.

Zvyčajna praź niekalki chvilin paśla pieršaj sustrečy samiec pačynaje pieraśledvać samku ŭ rytuale zalacańnia, i nieŭzabavie samka vypuskaje svaje jajkakletki ŭ vadu, a samiec ich adrazu ž apładniaje. Ale ŭ hienietyčna madyfikavanych parach apładnieńnie adbyvałasia tolki ŭ adnym vypadku ź dziesiaci.

Sakretahranin-2 — heta bujny białok, jaki važny dla narmalnaha funkcyjanavańnia kletak mozhu i inšych kletak, što vyłučajuć harmony dla kantrolu funkcyj arhanizma, takich jak rost i razmnažeńnie. Jon prysutničaje nie tolki ŭ arhaniźmie ryb, ale i ŭ inšych žyvioł i čałavieka.

«Adnak hety białok moža być padzieleny na častki admysłovymi fiermientami, i my vyjavili, što adzin jaho nievialiki frahmient, zvany pieptydam sakretanieŭrynu, važny dla stymulacyi pałavoj funkcyi», — pryvodziacca ŭ pres-relizie słovy kiraŭnika daśledavańnia Vensa Trudo, prafiesara kafiedry niejraendakrynałohii Ataŭskaha ŭniviersiteta.

Šlacham adnarazovaj injekcyi pieptydu sakretanieŭrynu navukoŭcam udałosia častkova adnavić pałavuju funkcyju ŭ hienietyčna źmienienych ryb. Aŭtary miarkujuć, što pieptyd dziejničaje na kletki ŭ mozhu i hipofizie, pavialičvajučy vyzvaleńnie harmonaŭ. Na ich dumku, heta možna razhladać jak papiaredni dokaz taho, što mutacyi sakretahraninu-2 pryvodziać da parušeńnia seksualnych pavodzinaŭ u žyvioł u cełym, a z dapamohaj sakretanieŭrynu, jaki vykonvaje funkcyju pałavoha harmona, hetuju situacyju možna vypravić.

Navukoŭcy płanujuć vykarystoŭvać hienietyčna madyfikavanych rybak dania ŭ jakaści łabaratornaj madeli dla pošuku inšych faktaraŭ, źviazanych sa śfieraj pałavych funkcyj — ci heta pavieličeńnie nierastu ŭ kultyvavanych vidaŭ ryb, ci pošuk novych mietadaŭ lačeńnia biaspłodździa ŭ čałavieka.

Клас
0
Панылы сорам
0
Ха-ха
0
Ого
0
Сумна
0
Абуральна
0