Siarhiej Zikracki, fota BAŽ
Advakat Siarhiej Zikracki hatovy biaspłatna padtrymać jurydyčna ŭ peryjad vybaraŭ. Pra heta jon napisaŭ u fejsbuku, adreahavaŭšy na Dekłaracyju za sumlennyja vybary ŭdzielnika vybarčaj kampanii Viktara Babaryki.
Babaryka paabiacaŭ jurydyčnuju i finansavuju padtrymku tym, kaho zvolniać ci na kaho buduć cisnuć.
«Całkam padtrymaju jaho ŭ hetym pačynańni. Možna pa-roznamu stavicca da roznych pretendentaŭ, možna pa-roznamu stavicca navat da pytańnia ŭdziełu ci bajkatavańnia vybaraŭ. Ale ŭ lubym vypadku stavić svoj podpis za adnaho pretendenta, niekalkich abo naohuł nie stavić podpisu, iści na vybary ci nie, hałasavać za adnaho kandydata abo inšaha — heta tolki naš vybar. I nichto nie maje prava pazbavić takoha vybaru», — adznačyŭ Siarhiej Zikracki.
U suviazi z hetym jon hatovy akazvać jurydyčnuju dapamohu ŭ pytańniach, źviazanych z vybarčaj kampanijaj.
— Kali prymušajuć padpisvacca za adnaho z pretendentaŭ,
— kali cisnuć, kab stali členam vybarčaj kamisii,
— kali ličycie, što pravy parušanyja za (nie)udzieł u vybarčym pracesie,
— kali chočacie abskardzić dziejańni/biaździejnaść padčas vybarčaj kampanii,
— kali patrebna kansultacyja ŭ vybarčym zakanadaŭstvie.
Siońnia sumlennyja i spraviadlivyja vybary zaležać ad kožnaha z nas, padsumoŭvaje Zikracki.
Zakon ab advakatury nie adnosić padobnaha rodu kansultacyi da vypadkaŭ, kali jurydyčnaja dapamoha akazvajecca biaspłatna. U suviazi z hetym padrychtoŭka zajavy, skarhi, pradstaŭleńnie ŭ sudzie abo dziaržaŭnych orhanach budzie kaštavać 1 rubiel.
Termin dziejańnia akcyi — ad 1 červienia da 31 žniŭnia.
