Fota Nadziei Bužan
Viktar Babaryka padaŭ u CVK zvarot ab faktach parušeńnia zakanadaŭstva padčas vybarčaj kampanii. Da ich jon adnios prymus padpisvacca za dziejnaha prezidenta, abrazy pretendentaŭ u kandydaty Alaksandram Łukašenkam i supraćpraŭnyja dziejańni suprać siabraŭ inicyjatyŭnych hrup pretendentaŭ, piša Tut.by. U vypadku, kali parušeńni paćvierdziacca, jon prosić źniać Łukašenku z vybaraŭ.
Za pieršy tydzień kampanii kamanda Viktara Babaryki ŭbačyła nievierahodna šmat parušeńniaŭ, jakija adbyvajucca na miescach, i ŭ jaje jość źviestki i skrynšoty, jakija śviedčać ab tym, što va ŭniviersitetach, na pradpryjemstvach, u hramadskich abjadnańniach ludziej prymušajuć padpisvacca za dziejnaha prezidenta.
— Plus vystupleńni prezidenta, ciapier — pretendenta na pasadu kiraŭnika dziaržavy, i dziaržaŭnyja ŚMI ŭtrymlivajuć, z majho punktu hledžańnia, dosyć šmat infarmacyi, jakuju možna ličyć parušajučaj zakanadaŭstva. Naprykład, pramyja abrazy ŭ adras pretendentaŭ u kandydaty i ŭtojvańnie niejkaj infarmacyi, kali kažuć, naprykład: «finansujecca z-za miažy» — heta pramoje parušeńnie.
Kali ŭ vas jość fakty — pradjavicie, kali ich niama — heta paklop. Nu i, viadoma, supraćpraŭnyja dziejańni [zatrymańni], jakija adbyvajucca.
Uvieś hety kompleks parušeńniaŭ my źviali ŭ dekłaracyju ab sumlennych vybarach i robim pieršy krok, kab joj prytrymlivacca: sabrali materyjały, skrynšoty i padali ŭsio heta ŭ CVK. CVK abaviazany nam adkazać pa asobnych pałažeńniach na praciahu troch dzion, pa inšych — na praciahu dziesiaci, — raspavioŭ TUT.BY Viktar Babaryka.
Babaryka nie staŭ pryvodzić kankretnyja fakty, pieradadzienyja ŭ CVK, ale raspavioŭ, što siarod ich jość zvarot studentaŭ, jakim rektar u ramkach navučalnaha pracesu havaryŭ prychodzić z pašpartami i pakidać podpis za dziejnaha prezidenta. Tym, chto heta rabiŭ, aŭtamatam stavili adznaku za ispyt. Aŭdyjozapisy Babaryka pieradaŭ u CVK razam sa zvarotam.
— My chočam zrazumieć: kali heta dapuščalna, značyć, heta dapuščalna dla ŭsich kandydataŭ. To-bok, ja mahu dakładna tak ža vykarystoŭvać administracyjny resurs usich pradpryjemstvaŭ?
Sapraŭdy hetak ža mahu abraźliva abo niapravilna vykazvacca pra ŭsich pretendentaŭ u prezidenty i mnie taksama za heta ničoha nie budzie? Kali my atrymajem paćviardžeńnie hetaha, značyć, buduć voś takija vybary, — adznačyŭ pretendent u prezidenty.
U zvarocie, jaki Babaryka apublikavaŭ na svaim sajcie, jon pakazvaje, što nikoli nie śćviardžaŭ, što dziejučy prezident prapanoŭvaŭ jamu pasadu premjer-ministra, a taksama nikoli nie vykarystoŭvaŭ hrašovyja srodki zamiežnych asob dla finansavańnia svajoj vybarčaj kampanii.
***
Viktar Babaryka prosić:
1. Pry vyjaŭleńni padčas razhladu hetaha zvarotu parušeńniaŭ zakanadaŭstva, nazvanych u art. 68-1 VK RB — admović u rehistracyi ŭ jakaści kandydata ŭ prezidenty A. Łukašenku;
2. Pry vyjaŭleńni ŭ chodzie razhladu hetaha zvarotu prama nie nazvanych u art. 68-1 VK RB faktaŭ parušeńnia zakanadaŭstva ab vybarach — vynieści papiaredžańnie A. Łukašenku jak asobie, jakaja vyłučajecca kandydatam u prezidenty Respubliki Biełaruś;
3. U vypadku pravierki podpisaŭ, sabranych pry vyłučeńni Łukašenki A. R., pravieryć u tym liku podpisy, sabranyja členami inicyjatyŭnych hrup, jakija źjaŭlajucca supracoŭnikami ustanoŭ (arhanizacyj), ukazanych u Dadatku No1 da ciapierašniaha zvarotu, i na padstavie art. 61 VK RB ličyć usie podpisy na takich padpisnych listach niesapraŭdnymi pa abstavinach, vykładzienych u zvarocie;
4. Dać Babaryku V. D., mahčymaść vystupić publična z asprečańniem iłžyvych źviestak va ŭsich srodkach masavaj infarmacyi i na ŭsich kanałach, pa jakich byli raspaŭsiudžany haniačyja Babaryku V. D. źviestki;
5. Dać členam inicyjatyŭnaj hrupy Babaryki V. D. mahčymaść na anałahičnych umovach (u pracoŭny čas, z daviadzieńniem infarmacyi da ŭsich rabotnikaŭ (navučencaŭ) prapanavać žadajučym rabotnikam (navučencam) u arhanizacyjach, ukazanych u dadatku No1 pastavić podpis za vyłučeńnie Babaryki V. D. u jakaści kandydata ŭ Prezidenty Respubliki Biełaruś
Nahadajem, 29 maja Alaksandr Łukašenka, naviedvajučy MTZ, dapuściŭ šerah emacyjnych vykazvańniaŭ na adras pretendentaŭ na pasadu prezidenta i ich paplečnikaŭ. Razvažajučy pra toje, chto moh prapanavać Babaryku pasadu premjer-ministra, Łukašenka namiaknuŭ na finansavańnie kampanii eks-bankira z Rasii.
— Vy viedajecie, na čyje hrošy jon bałatujecca, — skazaŭ Łukašenka.
