«U hety niaprosty čas jość rezon trymać ekanomiku na ručnym kiravańni, navat niahledziačy na rekamiendacyi i «recepty» mižnarodnych finansavych instytutaŭ», — piša staršynia Savieta Respubliki Natalla Kačanava ŭ dakładnoj zapiscy «Ab rašeńni sistemnych prablem ekanomiki» na adras Alaksandra Łukašenki.
Dakumient, składzieny 30 krasavika, apynuŭsia ŭ rasparadžeńni «Našaj Nivy». Jon byŭ dasłany ŭ telehram-kanał žurnalista Arcioma Harbaceviča.
Natalla Kačanava ŭžo nie ŭznačalvaje Administracyju prezidenta, ale pa-raniejšamu zastajecca adnym z mazhavych centraŭ ułady.
Natalla Kačanava, fota Nadziei Bužan
Čytajcie taksama:
Jakuju rolu ŭ krainie vykonvaje Kačanava, u čym jaje promachi i za što jaje palubiŭ Łukašenka?
Historyja žyćcia Natalli Kačanavaj: jak valejbalistka z vodakanała stała samaj vysokapastaŭlenaj žančynaj Biełarusi
Kačanava robić piać prapanovaŭ pa tym, jak palepšyć ekanamičnuju situacyju.
1. Skaracić vydatki biudžetu. Ideja ŭ tym, kab budavać infrastrukturu i sacyjalnyja abjekty z dapamohaj pryvatnych inviestaraŭ.
2. Abaranić unutrany rynak i praduchilić nieabhruntavany rost cen. Kačanava piša, što Minhandlu musić kropkava strymlivać rentabielnaść i abmiažoŭvać handlovyja nadbaŭki.
Aproč taho, treba ŭsialak padtrymlivać ajčynnych vytvorcaŭ — naprykład, kab dziaržava pry zakupkach davała prefierencyi biełaruskim kampanijam. Kačanava papiaredžvaje, što ŭrad budzie suprać hetaj idei, bajučysia, što Rasija i inšyja krainy JEAES buduć dziejničać lusterkava. Ale, maŭlaŭ, Rasija i tak nie puskaje biełaruskija tavary, tamu ničoha strašnaha, zavočna spračajecca z uradam Kačanava
3. Treba zakupić pabolš syraviny na čorny dzień, kab harantavać charčovuju biaśpieku. Kab Biełkaapsajuz skuplaŭ liški ŭ nasielnictva, možna dać jamu niedarahija kredyty.
4. Kačanava zaŭvažaje, što banki pracujuć z hihanckimi prybytkami, vyšejšymi, čym inšyja śfiery. Tamu jana prapanuje, kab banki kuplali akcyi pradpryjemstvaŭ i finansavali inviestycyjnyja prajekty.
5. Narešcie, možna śpisać pradpryjemstvam kursavyja roźnicy. Dalar skača tudy-siudy, i heta bje pa finansavaj spravazdačnaści kampanij, jakija pryciahnuli zamiežnyja kredyty. Tamu prapanujecca dazvolić pradpryjemstvam adlustroŭvać kursavyja roźnicy, utvoranyja ŭ 2020 hodzie, ŭ spravazdačnaści za nastupnyja pieryjady.
Admietna, što pierad tym jak trapić na stoł Łukašenku, dakład Kačanavaj musić atrymać rezalucyju Dziaržkantrolu. Jaho staršynia Leanid Anfimaŭ daŭ svaju zhodu 8 maja.