U pieryjad z 6 pa 31 maja pa palityčnych matyvach pa krainie byli zatrymanyja jak minimum 195 čałaviek, paviedamlajuć pravaabaroncy-viasnoŭcy. 18 čałaviek za hety pieryjad zatrymlivali pa 2 ci navat 3 razy.
Na praciahu maja ŭ Biełarusi prajšło kala 155 sudoŭ pa palityčna matyvavanych administracyjnych spravach u dačynieńni da jak minimum 132 čałaviek. Ź ich bolš za 135 sudoŭ — za ŭdzieł u niesankcyjanavanych masavych mierapryjemstvach.
72 čałavieki aštrafavanyja na 2352 bazavyja (63 504 rubli). Najbolšy štraf atrymaŭ brescki aktyvist Vital Kazak. Jon pavinien zapłacić 140 bazavych vieličyń (3780 rubloŭ) štrafu za ŭdzieł u akcyjach suprać zavoda AKB.
69 čałaviek atrymali aryšty terminam ad 2 da 25 sutak. Niekalki aktyvistaŭ, siarod jakich błohiery Siarhiej Cichanoŭski, Uładzimir Niaronski, aktyvisty Juryj Ułasaŭ, Stanisłaŭ Paŭlinkovič i žurnalist Michaił Aršynski, byli dvojčy ci trojčy asudžanyja na novyja «sutki». Ahulnaja kolkaść atrymanych «sutak» u mai — 719.
Administracyjnyja sudy prajšli ŭ 22 haradach krainy, siarod jakich Minsk, Viciebsk, Homiel, Babrujsk, Mahiloŭ, Orša, Pastavy, Połack, Navapołack, Miory, Šarkaŭščyna, Hłybokaje, Vilejka, Maładziečna, Słuck, Hrodna, Lida, Brest, Pinsk, Mazyr, Žłobin, Marjina Horka. Bolš za ŭsio sudoŭ prajšło ŭ Minsku (bolš za 27), Mahilovie (22), Breście (20).
Horadam-«rekardsmienam» pa kolkaści vyniesienych «sutak» staŭ Mahiloŭ. Tam 18 čałaviek atrymali ŭ sumie 164 sutak.
84% ad usich administracyjnych pratakołaŭ, pa jakich sudzili aktyvistaŭ na praciahu maja, — heta pratakoły ab parušeńni zakanadaŭstva ab masavych mierapryjemstvach (art. 23.34 KaAP). Za ŭdzieł u niesankcyjanavanych masavych mierapryjemstvach sudzili padpisčykaŭ youtube-kanała «Kraina dla žyćcia», jakija prychodzili na sustreču ź jaho aŭtaram Siarhiejem Cichanoŭskim i vykazvalisia pra svaje prablemy. Pa hetym ža artykule sudzili prychilnikaŭ Cichanoŭskaha, jakija paśla jaho pieršaha zatrymańnia vyjšli na stychijnyja akcyi salidarnaści ŭ Mahilovie, Minsku i Homieli.
Bolš za 20 čałaviek sudzili za niepadparadkavańnie supracoŭnikam milicyi pry zatrymańni. Takija pratakoły byli składzienyja na zatrymanych prychilnikaŭ Cichanoŭskaha 6 maja kala HC Mile i na zatrymanych u Viarchoŭnym sudzie aktyvistaŭ, jakija pryjšli padtrymać na sudach niezarehistravanych «kandydataŭ pratestu».
Nie abyšłosia i biez štrafaŭ niezaležnym žurnalistam za prafiesijnuju dziejnaść. Łarysa Ščyrakova, Andrej Tołčyn i Źmicier Łupač byli pakaranyja štrafami za vyrab pradukcyi ŚMI dla telekanała «Biełsat».
