Skryn ź viečarovaha efiru BT 31 traŭnia. U aranžavym kole — centar patasoŭki, u zialonym — Iryna Fiedarenka ź Siarhiejem Kałmykovym
Dziaŭčyna zatrymanaha pa «spravie Cichanoŭskaha» Siarhieja Kałmykova raskazała «Svabodzie» pra zatrymańnie i pieratrus u ichnaj kvatery.
Iryna Fiedarenka i Siarhiej Kałmykoŭ byli na Savieckaj płoščy ŭ Horadni 29 traŭnia. Heta była ichnaja pieršaja ŭ žyćci palityčnaja akcyja. Raniej jany nie cikavilisia palitykaj, navat nie chadzili na imprezy kštałtu śviatkavańnia #BNR-100. Jany pryjšli litaralna za 10 chvilin da taho, jak pačalisia zatrymańni. Pa słovach Iryny, «hetyja žančyny ŭžo biehali za Cichanoŭskim».
Ale maładyja ludzi nie źviarnuli na heta asablivaj uvahi. Jany jašče nia vyrašyli, za jakoha patencyjnaha kandydata stavić podpis.
«My stajali na parapecie. Padumali stanavicca ŭ čarhu za Śviatłanu [Cichanoŭskuju]. Jany akurat tady padbiehli, uvieś hety śvist, ham. My pahladzieli, što tam niešta adbyvajecca, i adyšli dalej, kab ničoha surjoznaha dla nas nie było. Ubačyli, što nadta šmat ludziej z AMAPu, i pačali adychodzić, bo my bajalisia, što nam niešta zrobiać», — raskazvaje Iryna.
Siarhiej Kałmykoŭ, archiŭnaje fota
Akazałasia, što akurat da taho miesca, kudy adychodzili maładziony, padjechaŭ čyrvony aŭtobus. Adnym ź pieršych AMAP zatrymaŭ Siarhieja Kałmykova.
«Jany vyskačyli z aŭtobusa i brali ŭsich spres. Jany nie raźbirali. Uziali 17-hadovaha. Uziali tych, chto bližej, bo viedali, što narod pačnie adbivać hetych ludziej. Jany brali tych, kaho možna było za 2 sekundy daciahnuć da aŭtobusa i zakinuć tudy», — emacyjna ŭspaminaje dziaŭčyna.
Na jaje dumku, admysłova vybirali mužčyn. Iryna padbiehła da aŭtobusa, pačała kryčać, kab uziali i jaje, ale jaje nie čapali.
U Siarhieja dziaržaŭny advakat, jakoha jamu dali.
Uviečary kala 19:00 1 červienia ŭ horadzienskaj najmanaj kvatery, dzie žyli Siarhiej i Iryna, prachodziŭ pieratrus. Pryjšli adzin śledčy, dva amapaŭcy, dvoje paniatych nie z susiedziaŭ i «čałaviek, jaki pravodziŭ pieratrus». Iryna paprasiła ŭsich pakazać paśviedčańni, pračytała order na pieratrus i tolki tady prapuściła ich u kvateru.
«Ja raniej hladzieła takija filmy, detektyvy», — tłumačyć dziaŭčyna, adkul jana viedała, jak siabie pavodzić.
Iryna Fiedarenka
Jak ubačyła Iryna z ordera na pieratrus, Siarhiej Kałmykoŭ — padazravany ŭ kryminalnaj spravie pa č. 3 art. 364 Kryminalnaha kodeksu Biełarusi.
Pieratrus ciahnuŭsia dźvie hadziny.
«Pakul ja nie pačała zdymać na kameru, jany pieravaročvali ŭsio. Vyciažku ledź nie złamali. Šukali ŭsio, navat u majoj nižniaj bialiźnie, šukaŭ mužčyna… Kazali: «Vy na videa ničoha nia majecie prava zdymać». Ja im kažu: «Ja doma, maju prava rabić što chaču»», — zhadvaje surazmoŭnica.
Jana kaža, što pieratreśli ŭsie šafy na kuchni, u pakoi, navat śmietnicu. Šukali techniku, dakumenty i ŭlotki, źviazanyja ź Cichanoŭskim. Paśla taho jak dziaŭčyna pačała vieści videazdymku, jana zaŭvažyła, što da rečaŭ stali stavicca bolš aščadna, kłaści ich nazad u šafy.
Zabrali staryja knopačnyja telefony i fłešku Iryny. Inšaj techniki doma nie było.
Nakolki viedaje Iryna, u toj ža dzień prajšoŭ pieratrus u babuli Siarhieja ŭ vioscy ŭ Mastoŭskim rajonie, dzie chłopiec prapisany. U babuli chvoraje serca.
Nakolki viedaje Iryna, nieŭzabavie Siarhieja pieraviazuć u Horadniu.
