Pažar u vioscy Ivanava Słabada Lelčyckaha rajona zdaryŭsia napiaredadni. Spačatku zahareŭsia chleŭ, zatym połymia pierakinułasia na žyły dom, u jakim u toj momant znachodzilisia dzieci. Kali b nie miascovy laśnik Siarhiej Rohaŭ, to ŭsio mahło skončycca trahiedyjaj, piša Tut.by.

Siarhiej raspaviadaje, što z kalehami znachodziŭsia ŭ kantory lashasa, kali ŭbačyŭ dym. Za 150 mietraŭ hareŭ chleŭ, i ahoń užo pierakinuŭsia na dom. Siarhiej z kalehami kinulisia da miesca pažaru.

— My prybiehli, a kala doma dźviery harać. Hladzim u akno — nibyta nikoha. Potym Saša Varabiej vybiŭ łokciem škło, zazirnuli, a tam, akazvajecca, dvoje chłopčykaŭ hadoŭ 5 i 8 u adnych majtkach i maječkach cichieńka siadziać u zadnim pakoi.

Mužčyna zalez u pakoj praz akno, pieradaŭ chłapčukoŭ tavaryšu, a sam viarnuŭsia — raptam, kaža, jašče dzieci zastalisia.

— Prabiehsia pa chacie, u zadni pakoj, jon užo hareŭ, zajšoŭ — nikoha. Nu i ŭsio. Potym MNS pryjechali, a my pajšli pracavać, — budzionna raspaviadaje jon.

Siarhieju 45 hadoŭ, usio žyćcio žyvie ŭ Ivanavaj Słabadzie, pracuje ŭ miascovym laśnictvie Miłaševickaha lashasa. Svoj učynak čymści asablivym nie ličyć. «Nu kali b nie ja, dyk chto inšy vyratavaŭ by», — upeŭniena kaža jon i kateharyčna admaŭlajecca davać svajo fota dla publikacyi.

Siamja, u chacie jakoj zdaryŭsia pažar, pryjechała ŭ viosku paru hadoŭ tamu. Maci małych vychoŭvaje adna. Kali ŭsio zdaryłasia, žančyny doma nie było. Siarod mahčymych pryčyn pažaru ŭ MNS nazvali nieaściarožnaje abychodžańnie z ahniom.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?