21 maja inicyjatyŭnyja hrupy kandydataŭ u prezidenty pačali zbor podpisaŭ. Mała dla kaho sakret, što štaby apłočvajuć siabram svaich inicyjatyŭnych hrup takuju pracu. Chto z kandydataŭ kolki prapanuje?

Były kiraŭnik Parka vysokich technałohij Valeryj Capkała maje cełuju sistemu dla zborščykaŭ podpisaŭ. Za pieršuju sotniu sabranych aŭtohrafaŭ pretendent prapanuje pa 1 rubli za kožny podpis. Za druhuju sotniu — pa paŭtara rubli. Kali čałaviek sabraŭ bolš za 200 rosčyrkaŭ, to štab kandydata hatovy zapłacić pa dalary za kožny. Takuju voś matyvacyju abrała kamanda.

Chto jašče daje ŭznaharodu za podisy? Kiraŭnik partyi «Hramada» Siarhiej Čeračań asabliva nikoli nie chavaŭ, što hatovy apłačvać pracu zborščykaŭ. Jahony štab płacić pa 1 rubli za podpis. Čeračań kaža, što heta na bułačku, čaj i žeton u mietro.

Pa infarmacyi «NN», byłaja deputatka Pałaty pradstaŭnikoŭ Hanna Kanapackaja maje namier płacić 1,5 rubla za kožny podpis. Zrešty, tam situacyja nie samaja prostaja. I, mahčyma, suma moža istotna źmienšycca.

Kiraŭnik «Havary praŭdu» Andrej Dźmitryjeŭ taksama prapanuje minimalnaje ŭznaharodžvańnie. Siabry jahonaj inicyjatyŭnaj hrupy buduć atrymlivać pa $0,3 za sabrany aŭtohraf.

Kandydatka Natalla Kisiel, jakaja maje kala 100 zborščykaŭ, nibyta abiacaje płacić 1 jeŭra za kožny rosčyrk. Heta samyja vialikija taryfy, praŭda, jaje zborščykaŭ amal nichto nie bačyŭ.

A voś kamanda Viktara Babaryki pracuje zadarma — za ideju. Eks-bankir nie apłačvaje pracu svaich vałancioraŭ. Adno što tych udzielnikaŭ hrupy, jakija zaniatyja zboram ceły dzień, biaspłatna kormiać.

Ni pra jakija hrošy nie viadziecca havorka ŭ vypadku Śviatłany Cichanoŭskaj. Za jaje źbirajuć hledačy kanała «Kraina dla žyćcia».

Viadoma, što ničoha nie płacić svaim prychilnikam i mietalist Aleś Tabolič.

Alaksandru Łukašenku płacić asobna za pracu siabroŭ inicyjatyŭnaj hrupy niama patreby. Šmattysiačny ideałahičny i infarmacyjny aparat pracuje nie na hanararach, a na staŭkach — pryčym zarobki jamu płaciać nie z kišeni kandydata, a ź dziaržaŭnaha biudžetu, za našy padatki.

Zrešty, niaredka padčas papiarednich kampanij byvała tak, što kandydat abiacaŭ za podpisy peŭnuju sumu, a potym nie moh raspłacicca. Z padobnaj prablemaj u 2001 hodzie sutyknuŭsia Leanid Sinicyn. Chto viedaje, ci nie paŭtorycca heta ŭ kaho z kandydataŭ i sioleta.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?