Z roznych haradoŭ Biełarusi paviedamlajecca, što supracoŭniki milicyi praciahvajuć pieraśledavać aktyvistaŭ i ŭdzielnikaŭ lehalnych pikietaŭ pa zbory podpisaŭ za vyłučeńnie alternatyŭnych kandydataŭ, piša spring96.org.

Kala doma palityka Jaŭhiena Afnahiela ŭ Minsku ź viečara 2 červienia dziažurać nieviadomyja ŭ cyvilnym. Niekalki mašyn ź ludźmi, padobnymi na supracoŭnikaŭ milicyi, stajać na bližejšych da doma skryžavańniach i kala ŭvachodu. 

«Siońnia prykładna ŭ 21:00 ja zaŭvažyła try aŭtamabila, u kožnym ź jakich znachodziłasia pa dva-try čałavieki. Jany stajać da hetaha času na vulicach kala doma, dzie my žyviom, a taksama la ŭvachodu ŭ dvor. Takoje adbyvajecca ŭžo nie ŭ pieršy raz. Raniej tuju ž samuju karcinu my nazirali pierad tym, jak Jaŭhiena vykradali i aryštoŭvali», — skazała žonka aktyvista Kaciaryna Ludvih.

Ranicaj 3 červienia byŭ zatrymany Valancin Trocki. Jak miarkujecca, jon znachodzicca ŭ RUUS Frunzienskaha rajona. 

A 12:16 telehram-kanał «Šery kot» paviedamiŭ, što ŭ Połacku troje ŭ cyvilnym pryjechali dadomu da błohiera Alesia Krutkina. Kala 6 viečara jaho zatrymali. U zatrymańni brali ŭdzieł i supracoŭniki AMAP. Telehram-kanał «Jeŭrapiejskaj Biełarusi» paviedamlaje, što doma ŭ błohiera prachodzić vobšuk z udziełam kryminalnaha vyšuku.

Pravaabaroncam stała taksama viadoma, što ŭ RUUS Zavodskaha rajona Minska vyklikajuć abaroncu Kurapataŭ Valeryja Rabcava nibyta za ŭdzieł u pikiecie 31 traŭnia. Taksama za hety pikiet u Minsku na «Kamaroŭcy» ŭ milicyju vyklikajuć Siarhieja Mackojcia. Supracoŭniki RAUS patelefanavali jamu i skazali, što pryjeduć pa jaho na pracu.

U Navapołacku zatrymany Andrej Zujeŭ, zaŭtra nad im, imavierna, adbudziecca sud. Pra heta paviedamlajecca ŭ tielehram-kanale «Połack. Navapołack. Kraina dla žyćcia». Andrej Zujeŭ źjaŭlajecca vałancioram inicyjatyŭnaj hrupy Śviatłany Cichanoŭskaj, jon raspavioŭ, što ŭčora da jaho ŭ kvateru hrukalisia milicyjaniery, a potom pilnavali jaho pad domam. Raniej Andrej Zujeŭ adbyvaŭ 7 sutak aryštu za ŭdzieł u strymie Cichanoŭskaha.

Kala 17.30 viečara ŭ Navapołacku zatrymany siabra inicyjatyŭnaj hrupy Śviatłany Cichanoŭskaj Artur Sinieha. Jaho advieźli ŭ adździaleńnie milicyi dla składańnia pratakoła pa art. 23.34 KaAP.

Jak paviedamiŭ telehram-kanał «Maładoha frontu», taksama zatrymany pieršy sakratar Maładoha Frontu Maksim Urbanovič. Paviedamlajecca, što jaho zatrymali ranicaj pry vychadzie z ułasnaj kvatery. Ciapier aktyvist znachodzicca ŭ CIP na vuł. Akreścina. Imavierna, zaŭtra nad im adbudziecca sud. Vierahodna, za ŭdzieł u dazvolenym pikiecie 31 traŭnia na Kamaroŭskim rynku.

Клас
Панылы сорам
Ха-ха
Ого
Сумна
Абуральна