Viktar Babaryka z synam Eduardam i jahonaj dziaŭčynaj Alaksandraj Źvieravaj. Korsika, 2020 hod
Alaksandra Źvierava, siabroŭka Eduarda Babaryki, kiraŭnika inicyjatyŭnaj hrupy i syna patencyjnaha kandydata na prezydenta Viktara Babaryki ŭ interviju Svabodzie raskazała pra siamju Babarykaŭ, adnosiny z Eduardam, chvalu padtrymki paśla aryštu, a taksama čamu Viktar, Eduard i jana nia źjeduć ź Biełarusi
Alaksandra pracuje na kraŭdfandynhavaj platformie Ulej.by, razam z Eduardam jany ŭžo siem hadoŭ. Jana čakaje vykliku ŭ «orhany» i dziakuje ludziam za salidarnaść.
«18 červienia Edzik i Viktar Dźmitryjevič prosta źnikli»
— Alaksandra, jak niepasredna vas zakranuła zatrymańnie Eduarda i Viktara Babarykaŭ? Ci vas dapytvali? Što źmianiłasia ŭ vašym žyćci?
— Zatrymańnie Edzika i Viktara Dźmitryjeviča fizyčna, kali tak možna vykazacca, mianie nie kranuła. Pra emacyjny bok, dumaju, usio i tak zrazumieła. Treba razumieć, što 18 červienia Edzik i Viktar Dźmitryjevič prosta źnikli. Paśla padziejaŭ ź «Biełhazprambankam», aryštaŭ jaho menedžaraŭ, paśla aryštaŭ siabroŭ Viktara Dźmitryjeviča ŭ nas z Edzikam źjaviłasia damoŭlenaść: kali my nia razam, to niekalki razoŭ u dzień my śpisvajemsia. 18 červienia Edzik pierastaŭ vychodzić na suviaź. Ab zatrymańni ja daviedałasia z paviedamleńniaŭ štabu Babaryki.
Pieršyja dva dni da Edzika nie puskali advakataŭ. Z pryčyny karanavirusu (jakoha, jak my ŭsie viedajem, u Biełarusi niama) i «vučeńniaŭ» u departamencie finansavych raśśledavańniaŭ. Za minułyja 6 dzion advakataŭ da Edzika puścili ŭsiaho adnojčy. Chaču zaŭvažyć, što da 18 červienia ni Edzika, ni jahonaha baćku nie vyklikali ŭ orhany dla dopytu abo dačy jakich-niebudź pakazańniaŭ.
— Raskažycie bolš pra siabie, pra vašu adukacyju, pracu, zacikaŭleńni.
Eduard Babaryka, syn patencyjnaha kandydata na prezydenta Viktara Babaryki z Alaksandraj Źvieravaj i kamandaj Ulej. Archiŭnaje fota. Miensk, 2017 hod.
— U mianie dźvie vyšejšyja adukacyi ŭ dźviuch specyjalnaściach: pradusarstva ŭ sfery mastactva i reklamny menedžment. Ja pracavała ŭ reklamnaj studyi. Pajšła pracavać u Ulej amal adrazu paśla jaho zapusku. Spačatku viała sacyjalnyja sietki, potym stała kurataram prajektaŭ.
«Edzik umieje pryznavać svaje pamyłki — na moj pohlad, heta mocna charaktaryzuje čałavieka»
— Jak doŭha vy sustrakajeciesia z Eduardam? Jak paznajomilisia? Jak by vy mahli acharaktaryzavać jaho?
Eduard Babaryka i i Alaksandra Źvierava, Vilnia, 2014 hod.
— My z Edzikam razam siem hadoŭ. I praz 7 hadoŭ ja mahu pryjechać ź im na viačeru i prahavaryć čatyry hadziny zapar. Edzik — razumny, dobry, nievierahodna cikaŭny. Vielmi prystojny i spahadny. Jašče ŭ Edzika vielmi vysokija patrabavańni da siabie. I jon umieje pryznavać svaje pamyłki — na moj pohlad, heta mocna charaktaryzuje čałavieka.
— Što ciapier adbyvajecca z kvateraj Eduarda, u jakoj vy žyli razam?
— Usia majomaść Eduarda aryštavanaja.
— U interviju Biełsatu Viktar Babaryka raskazvaŭ, što pierad tym, jak abviaścić pra ŭdzieł u vybarach, mieŭ praciahłuju razmovu z synam, u vyniku syn jaho padtrymaŭ. Abodva jany ŭśviedamlali ŭsie ryzyki. Što vam raskazvaŭ Eduard pra heta?
— Usio, što kazaŭ Eduard mnie asabista, zastajecca pamiž nami.
— Što vy dumajecie pra toje, jak paviedamlajuć na dziaržaŭnym telebačańni pra hetuju spravu?
— Niadaŭna pračytała dobry žart u facebook: viartajecca viadoŭca BT dadomu, a žonka jaho pytajecca: tabie što hatavać — rys ci makaronu? «Rys», adkazvaje televiadoŭca i sumuje. Bo jon chacieŭ makaronu, ale zvyčku chłusić užo nie pieramahčy. Tam zamiest «chłusić» inšaje słova vykarystoŭvali, ale vy jaho publikavać nia budziecie:).
«I zaraz siabie mienavita palityčna aktyŭnaj nie liču»
— Ci vy sami raniej byli palityčna aktyŭnaj? Ci, jak vialikaja častka ludziej ź inicyjatyŭnaj hrupy Viktara Babaryki, praktyčna ŭpieršyniu prajavili palityčnuju i hramadzkuju aktyŭnaść?
— Nie, nie była. I zaraz siabie mienavita palityčna aktyŭnaj nie liču. Ja niadaŭna pisała ŭ svaim instahramie: zaraz reč nie ŭ palitycy, reč — u Spraviadlivaści. Biezumoŭna, ja ŭstupiła ŭ inicyjatyŭnuju hrupu Viktara Dźmitryjeviča: źbirała podpisy, vykonvała valanterskija zadańni. Dahetul u mianie takoha dośviedu nie było. Z mnohimi ludźmi ŭ štabie taja ž historyja.
Ja liču, što mnohija biełarusy kažuć, što jany apalityčnyja, bo vykazvać svaju dumku i rabić niejkija dziejańni va ŭmovach ciapierašniaj ułady jany nia bačać sensu. Ani žadańni narodu, ani dumki ludziej nie cikavyja ciapierašniaj uładzie.
«Kali jany razam, atrymlivajecca niejkaje realnaje braterstva piarścionka, jakoje nia mohuć złamać nijakija abstaviny»
— Vy — častka siamji Babarykaŭ. Ci mahli b vy bolej raskazać pra hetuju siamju znutry? Jakija heta ludzi? Jakija kaštoŭnaści hałoŭnyja dla hetaj siamji?
Patencyjny kandydat na prezydenta Viktar Babaryka z žonkaj Marynaj i małymi dziećmi. Archiŭnaje fota.
— Kali nie ličyć Edzika, bližej za ŭsio ź siamji ja była ź jahonaj mamaj. Jana była cudoŭnaja. Vielmi dobraja, vielmi soniečnaja. Ź niejmaviernaj zdolnaściu stvarać vakoł siabie ŭtulnaść, ciapło i kłapacicca pra ŭsich, chto choć trochi ŭ heta jaje akružeńnie traplaŭ. Jana pamiatała, chto što lubić, chto čym zachaplajecca, usimi cikaviłasia. Usia siamja Edzika fanacieje ad «Uładara Piarścionkaŭ». Mnie zdajecca, heta pra mnohaje śviedčyć.
Viktar Dźmitryjevič — razumny, charyzmatyčny i vielmi dobry čałaviek. Jon byŭ vielmi kachajučym mužam i zastajecca nievierahodna piaščotnym i kłapatlivym baćkam. Kali ja apublikavała niekalki ichnych zdymkaŭ u sacyjalnych sietkach, ludzi pačali pisać pra toje, što hetaja vielizarnaja luboŭ baćki i syna sčytvajecca na fatahrafijach, i čałaviek, jaki tak lubić svaju siamju, nia stanie drennym prezydentam.