Minskaja vobłaść pa zachvaralnaści na karanavirus śledam za Viciebskam i Minskam pajšła ŭniz. Ab hetym Alaksandr Łukašenka zajaviŭ siońnia ŭ čas razmovy z pracoŭnym kalektyvam «Biełaruśkalija», pieradaje BiełTA.

Fota Nadziei Bužan.

Fota Nadziei Bužan.

«Minskaja vobłaść u nas śledam za Viciebskam i Minskam pajšła ŭniz pa zachvaralnaści, — skazaŭ Alaksandr Łukašenka. — My mienš hladzim na teściravańnie ludziej, tamu što testy absalutna nie infarmatyŭnyja, a hladzim na pnieŭmanii. Luby virus, hety taksama, dziejničaje na lohkija, tamu hladzim na pnieŭmanii. Tam adrazu bačym, jość virus abo nie, i lečym hetych ludziej».

Razmaŭlajučy z rabotnikami pradpryjemstva, Łukašenka adkazaŭ na pytańni, jakija chvalujuć saliharčan. Adzin z rabotnikaŭ pradpryjemstva nahadaŭ, što chutka budzie pradoŭžana budaŭnictva nastupnaha ŭčastka trasy Minsk—Mikaševičy: sa Słucka da Salihorska. Jon paprasiŭ pradoŭžyć novuju darohu na 14 km dalej — da Starobina. Kiraŭnik dziaržavy adkazaŭ, što raboty buduć pradoŭžany. «Dumaju, što da Mikaševičaŭ dojdziem, tamu što nam heta daroha patrebna», — skazaŭ jon.

Alaksandr Łukašenka taksama paviedamiŭ, što paśla budaŭnictva ŭčastka Minsk—Mikaševičy płanujuć madernizavać darohu z Homiela da Bresta. Heta daść mahčymaść pierachapić tranzit z Rasii va Ukrainu i vyvieści jaho na Jeŭropu. Pryčym da finansavańnia rabot pavinny padklučycca i pryvatniki.

Pacikavilisia žychary Salihorska i staŭleńniem Łukašenki da łaźni. Alaksandr Łukašenka raskazaŭ, što chodzić u łaźniu praktyčna kožny dzień. «Učora była treniroŭka, paśla treniroŭki z synam pajšli ŭ łaźniu. Siońnia taksama treba krychu paparycca», — dadaŭ jon. Adnak pytańnie ab łaźni prahučała niezdarma, vyśvietliłasia, što miascovym žycharam nie chapaje ŭ horadzie łaźnievaha kompleksu. Stary budynak łaźni, pavodle ich słoŭ, znachodzicca ŭ drennym stanie. «Niečakanaje dla mianie pytańnie», — ździviŭsia Łukašenka i zapeŭniŭ, što ŭłady pradumajuć, jak vyrašyć hetu prablemu.

Клас
Панылы сорам
Ха-ха
Ого
Сумна
Абуральна