U Škłovie patanuŭ 42-hadovy mužčyna, ratujučy dvaich dziaciej. 11-hadovy i 13-hadovy školniki chacieli pakupacca ŭ zabaronienym miescy, paviedamlaje mogilevnews.by.
Zdareńnie adbyłosia viečaram 24 lipienia. 42-hadovy inžynier pradpryjemstva «Mietyz» Ihar Padkoŭka łaviŭ rybu z pravaha bieraha Dniapra na ŭskrainie Škłova. Jon zaŭvažyŭ, jak za siem mietraŭ ad jaho z-za prybiarežnych kustoŭ u vadu paleźli dvoje chłopcaŭ, ich adrazu padchapiła płyń.
Ihar u ličanyja siekundy, skinuŭšy ź siabie vierchniuju vopratku, skočyŭ u vadu, nyrnuŭ i, apynuŭšysia pobač z chłopcami, vynyrnuŭ na pavierchniu. U vyniku vyšturchnuŭ dziaciej na biaśpiečny račny ŭčastak — cichavod. Tam užo na nievialikaj hłybini vyratavanych padchapili i dastavili na bierah dva maładyja čałavieki, jakija padaśpieli na dapamohu, — adznačyli ŭ Asvodzie.
Sam Ihar Padkoŭka nie zmoh vyratavacca. Mahčyma, parušyŭ temp dychańnia, zachłynuŭsia vadoj. Cieła jaho było znojdziena na dnie i padniata na pavierchniu vadałazami.