Siońnia ŭ sudzie Frunzienskaha rajona pa Skype sudzili Alaksandra Vasileviča, uładalnika Vondel i Hepta, jakoha 28 lipienia, u aŭtorak, kala 18:00 zatrymali ŭnutry budynka KDB, kali jon pryjšoŭ padavać chadajnictva za Viktara Babaryku razam z hałoŭnym redaktaram The Village Biełaruś Jaŭhienijaj Suhak. Sud pryznaŭ Alaksandra vinavatym pa č. 1 art 23.34 — parušeńnie paradku arhanizacyi abo praviadzieńnia masavych mierapryjemstvaŭ i prysudziŭ jamu 14 sutak administracyjnaha aryštu, piša The Village.
U abvinavačvańni havorycca, što Alaksandr Vasilevič udzielničaŭ u masavym niesankcyjanavanym mierapryjemstvie kala budynka KDB z 17:10 da 17:30 i kryčaŭ: «Svabodu Babaryku!»
Jaŭhienija Suhak vystupała na sudzie ŭ jakaści śviedki. Jana raspaviała, što jany z Alaksandram u masavych mierapryjemstvach nie ŭdzielničali, a pryjšli ŭ toj viečar kala 17:50 da budynka KDB z kankretnaj metaj — padać chadajnictva.
Pa darozie da budynka jany razmaŭlali ab spravach, i Alaksandr ničoha nie kryčaŭ.
Na ŭvachodzie ŭ KDB jany raspaviali pra metu svajho prychodu, byli zaprošanyja ŭvajści, paśla čaho ich praviali ŭ pakoj, a adtul — u aŭtazak i advieźli ŭ RUUS.
