Kala 150 čałaviek pryjšli raźvitacca z pamierłym Kanstancinam Šyšmakovym, dyrektaram muzeju ŭ Vaŭkavysku, jaki nibyta admoviŭsia padpisać pratakoł vybarčaj kamisii, piša Radyjo Svaboda.

Kanstancinu Šyšmakovu było 29 hadoŭ. Jon pracavaŭ dyrektaram vajskova-histaryčnaha muzeja imia Bahracijona ŭ Vaŭkavysku na Horadzienščynie. Byŭ siabram vybarčaj kamisii na sioletnich vybarach. U jaho zastalisia žonka i małaja dačka.

Jak raniej kazaŭ Kanstancinaŭ baćka Andrej rasiejskamu vydańniu «Mieduza», syn nie padpisaŭ vynikovy pratakoł 9 žniŭnia. Potym tydzień jon byŭ u adpačynku. U niadzielu 15 žniŭnia vyjšaŭ na pracu, uviečary pazvaniŭ žoncy, što pracavać u muzei bolš nia budzie, skazaŭ, što jedzie dachaty. Dadomu jon nie viarnuŭsia.

U toj viečar žonka zajaviła ŭ milicyju ab źniknieńni muža. Pošukavy atrad «Anhieł» 18 žniŭnia znajšoŭ aŭtamabil mužčyny ŭ Mastoŭskim rajonie, a potym i jahonaje cieła pablizu ŭ lesie.

Na terytoryi špitalu raźvitalnaja zala. Nievialikimi hrupkami stajać ludzi. Cišynia. Nie danosiacca navat abryŭki razmovaŭ. Na kreśle pierad uvachodam, schiliŭšysia da kaleniaŭ bieśpierapynna płača maleńkaja suchieńkaja žančyna. Heta babula Kanstancina.

«Ja ničoha nia viedaju», — kaža bledny mužčyna ŭ čornym. Kaža, što jon dziadźka niabožčyka, i nakiroŭvaje da blizkich svajakoŭ. Jaho ŭvieś čas trasie drobnymi dryžykami. Jon namahajecca strymlivać płač. Asobna stajać maci i baćka niabožčyka Andrej, a taksama žonka Maryja ź siastroj. Havaryć jany admaŭlajucca.

«Darujcie, my nia budziem kamentavać. Mnie vielmi šmat zvaniła žurnalistaŭ z Maskvy, ź Pieciarburha. My ničoha nia budziem havaryć. Ja nie chaču. U mianie dzicia», — vietliva adkazvaje Kanstancinava ŭdava. Maryja pracuje pedahoham-arhanizataram u miascovaj himnazii. U siamji raście 4-hadovaja dačka. Znajomyja siamji kažuć, što Kanstancin vielmi lubiŭ małuju, sužency planavali jašče dziaciej.

Pryvieźli trunu, vieka nie adkryli. Kvietki kładuć prosta źvierchu. Prynieśli partret z čornaj stužkaj, ź jakoha hladzić zusim małady chłopiec. Śpiavajuć zaprošanyja žančyny-katalički. Babula siadzić hetak ža schiliŭšysia i płača. Rydaje ŭdava. Nieprykmietna staić u zali małady ksiondz.

«Miej miłosierdzie dla nas i całego świata», — hučna molacca ludzi. Kali i pierahavorvajucca, to paŭšeptam. Kanstancina charaktaryzujuć karotka: «Dobry čałaviek». Havaryć pra abstaviny pierad jahonaj śmierciu, pra atmasferu na pracy nichto nia choča — «u nas maleńki haradok, nam tut jašče žyć, usie bajacca». «Heta kryvadušša… Ja dumaju, usie, chto tut znachodzicca, viedajuć sapraŭdnuju pryčynu», — cicha kaža znajomaja siamji.

«U ich byli vielmi dobryja adnosiny. Niechta zaraz sprabuje kazać, nibyta pobytavyja prablemy jaho padkasili. Heta dakładna nia tak. U ich była vielmi zdarovaja siamiejnaja atmasfera», — tłumačyć kaleha Maryi, jakaja pryjšła jaje padtrymać.

Pryjšli raźvitacca žychary Vaŭkavysku, jakija nia viedali niabožčyka.

«Usie pra heta kažuć — jakaja niespraviadlivaść. Takoha prosta tak nie byvaje», — miarkuje adzin ź ich. Niekatoryja kalehi Kanstancina z pracy płačuć, razmaŭlać nia chočuć: «Nam niama čaho pra heta skazać». Koratka adznačajuć, što byŭ dobrym čałaviekam.

Z Horadni pryjechali adnahrupniki Kanstancina pa vučelni, supracoŭniki inšych muzejaŭ. Jany kažuć pra jaho jak pra dobraha, adkaznaha, aktyŭnaha čałavieka, jaki zaŭsiody byŭ hatovy dapamahčy. Dyrektaram staŭ, bo, vidać, nie było inšaj dobraj kandydatury na hetaje miesca.

«Kali jon braŭsia za spravu, zaŭsiody rabiŭ. Na pracy pačuvaŭsia vydatna. Što mahło zdarycca, ciažka skazać», — kaža jahony były adnahrupnik Pavieł.

Napieradzie raźvitalnaj pracesii iduć niekalki mužčyn u biełych adprasavanych kašulach i dziełavych spodniach. Tvary nie zapłakanyja i nie zasmučanyja. Adzin ź ich uvieś čas nervova azirajecca. «Čaho vy tut zdymajecie? Vam tut viasielle ci što?» — stroha pytajecca jon.

Nichto sa svajakoŭ dahetul nie aburaŭsia tym, što pryjechali i pracujuć žurnalisty.

Mužčyna ŭ biełaj kašuli kaža, što z Kanstancinam nie pracavaŭ razam, ale «pierasiakalisia pa pracy». Zaŭvažaje, što pryčynaj śmierci mahli stać siamiejnyja prablemy, i sychodzić ad hutarki.

Śledčy kamitet pravodzić pravierku pa fakcie śmierci mužčyny 1991 hoda naradžeńnia. Pavodle papiaredniaj versii, kryminału ŭ śmierci mužčyny nia vyjavili.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?