«Kab nie čakać, pakul mianie paprosiać syści, ja napisaŭ zajavu na zvalnieńnie sam. Siońnia byŭ apošni dzień majoj pracy», — kaža Dźmitryj Rytvinski.

Dźmitryj Rytvinski, fota sa staronki ŭ fejsbuku

Dźmitryj Rytvinski, fota sa staronki ŭ fejsbuku

Pałova kalektyvu — prykładna 88 čałaviek — Nacyjanalnaha kadastravaha ahienctva padpisała adkryty zvarot da ŭład, u jakim asudžajuć biespadstaŭnuju žorstkaść siłavikoŭ u dačynieńni da mirnych hramadzian. Rabotniki patrabujuć spynieńnia krovapralićcia, spraviadlivaha rasśledavańnia ŭsich faktaŭ pieravyšeńnia słužbovych paŭnamoctvaŭ, vyzvaleńnia ŭsich palitźniavolenych, praviadzieńnia novych vybaraŭ, vykanańnia zakona, harantavańnia hramadzianskich pravoŭ i biaśpieki dla ŭsich hramadzian.

List užo nakiravany ŭ Dziaržaŭny kamitet pa majomaści, Administracyju prezidenta, Hienieralnuju prakuraturu, Saviet Respubliki, Kanstytucyjny sud, Viarchoŭny sud i Saviet ministraŭ. U vypadku niereahavańnia na jaho i nievykanańnia patrabavańniaŭ supracoŭnikaŭ NKA, jany buduć razhladać pravavuju mahčymaść praviadzieńnia zabastoŭki.

«U nas byli dźvie sustrečy kiraŭnictva z pracoŭnym kalektyvam z nahody adkrytaha zvarotu. Havaryłasia pra toje, što, maŭlaŭ, treba pierafarmulavać, skarektavać i hetak dalej. Takaja hulnia ŭdoŭhuju: zahavaryć i ničoha pa vyniku nie zrabić», — kaža Dźmitryj Rytvinski.

Užo eks-namieśnik hiendyrektara NKA adznačaje, što ŭ kalektyvie zaraz vielmi składany maralna-psichałahičny klimat. Padziei, jakija adbylisia paśla 9 žniŭnia, dziejańni siłavikoŭ abmiarkoŭvali ŭsie.

«Ludzi pieražyvajuć, bajacca, što budzie dalej. Ja nikoha nie zaklikaŭ zvalniacca, u lubym razie arhanizacyja niejak pavinna pracavać, nie spyniacca. Chto prymie svajo samastojnaje rašeńnie syści — heta budzie jaho rašeńnie, — akcentuje Dźmitryj. — Pakul ja nie viedaju, što budu rabić dalej. Treba pieražyć hety momant, bo emacyjnaje napružańnie pierad pryniaćciem rašeńnia ab sychodzie było davoli vysokaje, asabliva ŭčora.

Dahetul pieražyvaju za toje, što adbyvajecca ŭ krainie. Ja nie zhodny z toj palitykaj, jakuju zaraz pravodzić ułada. Pracavać u dziaržaŭnaj arhanizacyi ŭ sistemie, dzie ty nie zhodny z palitykaj, jakuju pravodzić dziaržava, — heta taksama dziŭna. Tabie pieryjadyčna buduć ukazvać, što treba rabić, jak heta było, u pryncypie, i raniej. Zaraz heta, mahčyma, budzie jašče ŭ bolš žorstkaj formie. Eskałacyja napružańnia, cisku, jana raptoŭna nikudy nie dzieniecca. Pracu zaŭsiody možna adšukać, a voś sumleńnie, kali zhubiš, možna ŭžo i nie znajści».

Dźmitryj Rytvinski pracavaŭ u Nacyjanalnym kadastravym ahienctvie na praciahu 18 hod.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?