Niekalki dzion dziaržaŭnaje telebačańnie raspaviadaje svaim hledačam ab niejkaj «prahramie apazicyjnaha štaba», dzie praduhledžany praktyčna poŭny razryŭ siabroŭskich adnosin z Rasijaj, «paŭzučaja zabarona ruskaj movy» i novy kantrolny orhan nad dziaržaŭnymi ŚMI. TUT.BY razabraŭsia, što heta za prahrama i jaki «apazicyjny štab» jaje moh raspracavać.

Ab prahramie «apazicyjnaha štaba», u jakoj pieraličanyja pieršačarhovyja miery da 2021 hoda i doŭhaterminovyja — da 2030 hoda, kazaŭ Alaksandr Łukašenka na naradzie z členami Savieta Biaśpieki.

18 žniŭnia pres-słužba prezidenta raźmiaściła ŭ telehram-kanale «Puł pieršaha» videa, dzie jon ahučvaje punkty z hetaj prahramy. U pryvatnaści, hučaŭ namier ab vychadzie z usich intehracyjnych arhanizacyj, dzie daminuje Rasija, i viartańnie pahraničnaha kantrolu na miažy Biełarusi i Rasii, a taksama vychad z ADKB i zakryćcio rasijskich vajennych baz. Dalej hučali punkty pra zabaronu prodažu rasiejskim kampanijam abjektaŭ biełaruskaj infrastruktury, vyzvaleńnie ŚMI ad dziaržaŭnaha kantrolu i pieradača ich pad kantrol kaardynacyjnaj rady, zabarona tranślacyi rasiejskich telekanałaŭ i dopusk u efir telekanałaŭ inšych susiednich krain, «paŭzučaja zabarona rasiejskaj movy».

Paźniej ab prahramie stali rehularna kazać na dziaržaŭnym telebačańni, pakazvajučy, jakimi nastupstvami moža abiarnucca dla krainy jaje realizacyja. Naprykład, u navinach telekanała «Biełaruś 1» 20 žniŭnia zadalisia pytańniem «Što biełarusam prapanuje alternatyŭny bok?». U siužecie havorycca pra toje, jakija barjery i składanaści pryniasie Biełarusi realizacyja takoj prahramy.

Pa słovach viadučaha, «prahrama tak zvanaha apazicyjnaha štaba» praduhledžvaje vychad z sajuznaj dziaržavy, JEAES i inšych intehracyjnych arhanizacyj, dzie daminuje Rasija. «Napieradzie zvalnieńni i navat vierahodnaje zakryćcio vytvorčaściaŭ», — kamientuje takoje raźvićcio karespandent. Heta «aznačaje abnuleńnie ŭsich roŭnych mahčymaściaŭ dla biełarusaŭ u Rasiei. Nie vyjdzie atrymać tam biaspłatnuju adukacyju, pasłuhi achovy zdaroŭja, i znachodzicca tam my budziem na pravach zamiežnikaŭ», — hučyć u efiry.

U inšym siužecie taho ž telekanała, užo za 21 žniŭnia, havorycca, što hetuju prahramu nibyta prapanuje Kaardynacyjny štab apazicyi. «Źjaviŭšysia ŭ Internecie, jana tut ža źnikła, a sami aŭtary stali ŭsialak adchryščvacca ad zajaŭlenych metaŭ», — kaža viadučy.

Što za «apazicyjny štab» i jakaja ŭ jaho prahrama?

Bolšaść kandydataŭ u prezidenty paśla vybaraŭ viaduć palityčnaje i hramadskaje žyćcio nie tak maštabna, jak u pieradvybarčy pieryjad. Ale dosyć aktyŭnuju dziejnaść praciahnuła kamanda Śviatłany Cichanoŭskaj. Eks-kandydatka inicyjavała stvareńnie Kaardynacyjnaj rady «dla zabieśpiačeńnia tranśfieru ŭłady».

Možna zrabić vysnovu, što pad «apazicyjnym štabam» na telebačańni majecca na ŭvazie mienavita asiarodździe Cichanoŭskaj albo stvoranaja paśla vybaraŭ Kaardynacyjnaja rada.

Adnak u adkaz na ahučanuju Alaksandram Łukašenkam na naradzie z členami Savieta biaśpieki prahramu pradstaŭniki Kaardynacyjnaj rady zajaŭlali, što nie viedajuć, pra jakuju mienavita prahramu jon kazaŭ.

U dakumientach Kaardynacyjnaj rady nie zhadvajucca ahučanyja na dziaržaŭnym TB punkty. U rehłamiencie havorycca, što KR stvorana «z metaj arhanizacyi pracesu pieraadoleńnia palityčnaha kryzisu i zabieśpiačeńnia zhody ŭ hramadstvie na padstavie Kanstytucyi». A ŭ rezalucyi KR paznačana, što jana «nie stavić svajoj metaj źmianieńnie kanstytucyjnaha ładu i źniešniepalityčnaha kursu». Pra heta ž kazała pradstaŭnica KR Maryja Kaleśnikava.

Člen Kaardynacyjnaj rady juryst Maksim Znak na adnoj z pres-kanfierencyj taksama padkreślivaŭ, što ŭ rady niama nijakaj palityčnaj prahramy.

Na pytańnie TUT.BY ab najaŭnaści nazvanych u dziaržSMI punktaŭ u jakich-niebudź dakumientach abo ŭ pieradvybarnaj prahramie eks-kandydata Cichanoŭskaj jaje davieranaja asoba Mikałaj Kazłoŭ adkazaŭ admoŭna.

— Vy nidzie nie znojdziecie hetuju prahramu, tamu što jaje prosta niama. Heta chłuśnia ad pieršaha da apošniaha słova, — kaža Kazłoŭ. Jon nahadvaje na toje, što ŭ prahramie kandydata taksama nie hučali padobnyja pasyły.

U svajoj pieradvybarnaj prahramie Cichanoŭskaja staviła hałoŭnaj metaj «sumlennyja vybary z udziełam usich alternatyŭnych kandydataŭ», jakija mieła namier pravieści na praciahu šaści miesiacaŭ. Akramia hetaha, u jaje ŭklučanyja takija punkty, jak pryznačeńnie refierendumu z prapanovaj viarnucca da varyjantu Kanstytucyi 1994 hoda, adnaŭleńnie «zakonnaści ŭ śfiery kryminalnaha i administracyjnaha sudavodstva», pryznačeńnie novych hienprakurora i kiraŭnika Viarchoŭnaha suda. Biełaruś «budzie siabravać z usimi, ale tolki ŭ intaresach našaj ułasnaj krainy», zajaŭlałasia ŭ prahramie.

Клас
0
Панылы сорам
0
Ха-ха
0
Ого
0
Сумна
0
Абуральна
0