Pres-słužba MUS apublikavała šakujučuju navinu: rasijanin parezaŭ supracoŭnika milicyi ŭ Ivanavie. Pry hetym u napadnika znajšli siakieru i čornuju masku, jon rychtavaŭsia da ciažkaha złačynstva.

Nabor pradmietaŭ, jakija byli ŭ napadnika

Nabor pradmietaŭ, jakija byli ŭ napadnika

Voś tolki asoba napadnika dobra viadomaja miascovaj milicyi. Raniej 54-hadovy Aleh B. parezaŭ muža svajoj byłoj sužycielki, pahražaŭ samoj žančynie, dušyŭ jaje maci, byŭ departavany, ale nieadnarazova viartaŭsia ŭ Biełaruś.

Za ŭsie złačynstvy jon abychodziŭsia štrafami, milicyja, kali i zatrymlivała jaho, spakojna adpuskała na volu, zakliki sužycielki ab niebiaśpiecy i zajavy ab pahrozach prosta ihnaravalisia.

Aleh B.

Aleh B.

Chtości skaža — karma, chtości — niedapracoŭka pa linii prafiłaktyki złačynstvaŭ. Ale ŭ vyniku ad ruk mužčyny surjozna paciarpieli sami supracoŭniki milicyi.

Pačałosia ŭsio jašče paŭtara hoda tamu. 15 studzienia 2019 Aleh B. pryjechaŭ da svajoj byłoj sužycielki, ad jakoj u jaho dvoje dziaciej. Razam jany daŭno nie žyli.

Da jaho vyjšaŭ pahavaryć žanich žančyny. Jon byŭ ćviarozy.

Padčas razmovy Aleh kinuŭsia na mužčynu z nažom. Sprabavaŭ udaryć pad łapatku (parezanuju kurtku zabrała milicyja jak dokaz). Taksama parezaŭ tvar i mocna paraniŭ ruku: u mužčyny pierarezanyja suchažylli, rabili apieracyju.

Paśla Aleh B. uciok.

Pryjechała chutkaja, paranienaha zabrali ŭ balnicu. Rasijanina znajšli i zatrymali, ale nienadoŭha. Užo ŭviečary 16 studzienia milicyja adpuściła jaho, skłali tolki administratyŭny pratakoł — za toje, što Aleh abmaciukaŭ milicyjantaŭ.

Paśla pačałasia doŭhaja historyja. Kryminalnuju spravu nijak nie mahli zavieści, bo čakali ekśpiertyz, nie mahli znajści nož… Sam Aleh B. śćviardžaŭ: maŭlaŭ, ja nikoha nie rezaŭ, supiernik sam kinuŭsia na mianie z nažom.

U rasijanina navat nie ŭziali padpisku ab niavyjeździe. Jon maje nieruchomaść u Pinsku, dzie spakojna i žyŭ, praciahvajučy mučyć byłuju sužycielku. Aleh B. pastajanna dasyłaŭ joj paviedamleńni z namiokami na mahčymaść niaščasnaha vypadku, a to i z pramymi pahrozami. Dasyłaŭ ich i eks-sužycielcy, i jaje maci.

Žančyny pisali načalniku miascovaha RAUS ab tym, što ich faktyčna šantažujuć: B. patrabavaŭ, kab jaho byłaja sužycielka admoviłasia padavać na alimienty, inakš jon abiacaŭ abvinavacić žančynu ŭ vyrabie narkotykaŭ. Ale, pa słovach žančyn, i milicyja, i prakuratura adkazvali adpiskami.

Žančyny śćviardžajuć: B. adčuvaŭ svaju biespakaranaść. Jon uvieś čas telefanavaŭ i pisaŭ paviedamleńni z pahrozami, zachodziŭ u dvary, psavaŭ majomaść (navat kraŭ jajki z kuratnika). Na sudzie paklopničaŭ na byłuju sužycielku. Ale ŭsio skančałasia administratyŭnymi pratakołami. B. pryznavali vinavatym, ale jon zastavaŭsia na voli i praciahvaŭ teraryzavać žančyn.

A ŭ mai 2019 Aleh B. ździejśniŭ novy napad — na maci svajoj byłoj sužycielki. Žančyna čakała ŭ hości dačku z unukam, adčyniła dźviery — ale tam byŭ Aleh B. Jon uvajšoŭ u kvateru, dušyŭ žančynu, pahražaŭ padobnym na nož pradmietam i pahražaŭ jaje zabić, raspaviadała paciarpiełaja. Jana straciła prytomnaść. Paśla hetaha B. zabraŭ bujnuju sumu hrošaj — kala 2 tysiač dalaraŭ i ŭciok praz akno.

Paśla hetaj historyi B. usio ž źmiaścili pad vartu. Zaviali narešcie kryminalnyja spravy: i za hety napad, i za studzieński napad z nažom, paśla ich abjadnali.

Voś tolki akazałasia, što možna parezać čałavieka, dušyć i rabavać pažyłuju žančynu, pahražać svajoj byłoj — i nie sieści. Zimoju 2020 pačaŭsia sud. Aleha B. pakarali tolki za napad na žanicha sužycielki, pryčym kvalifikavali cialesnyja paškodžańni jak «mienš ciažkija». U vyniku jon atrymaŭ usiaho tolki štraf u 50 bazavych vieličyń.

Taksama mužčynu prapisali samastojna pakinuć Biełaruś. Jon heta praihnaravaŭ. Zastaŭsia ŭ Pinsku, praciahvaŭ pisać skarhi na eks-sužycielku va ŭsie instancyi, dasyłać žančynie pahrozy, sfarmulavanyja tak, kab u ich nie było pramoj niebiaśpieki: «Na tvaje dziejańni budzie niepaźbiežny asimietryčny adkaz».

U lipieni Aleha ŭsio ž zatrymali i vysłali ŭ Rasiju.

«U horšym vypadku mianie zakryjuć na niekalki hadoŭ — ale ja ž adnaznačna viarnusia i daviadu spravu da kanca, voś tolki budu našmat bolš zły, čym ciapier», — pisaŭ mužčyna svajoj byłoj «cieščy» jašče da napadu na jaje i da suda.

Chutčej za ŭsio, hetyja pahrozy i źbiraŭsia ažyćciavić mužčyna 3 vieraśnia. Pa infarmacyi MUS, Aleha sustreli na čyhunačnaj stancyi. Jon ubačyŭ milicyjantaŭ, dastaŭ z patajemnaj kišeni nož i kinuŭsia na apieratyŭnikaŭ. Adzin ź milicyjantaŭ atrymaŭ pranikalnaje ranieńnie brušnaj paražniny, rezanyja rany šyi i hrudziej.

Ciapier hety milicyjant u reanimacyi, jamu zrabili apieracyju, stan aceńvajuć jak siaredniaj stupieni ciažkaści, ale stabilny. Žyćciu jaho ničoha nie pahražaje.

Aleha B. u heta raz čamuści nie stali adpuskać na volu. Jon u izalatary, na jaho zaviali kryminalnuju spravu za zamach na zabojstva asoby, jakaja ažyćciaŭlała słužbovuju dziejnaść. Pakarańnie za heta suvoraje: tearetyčna až da rasstrełu.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?