Staršynia Kruhlanskaha rajvykankama Ściapan Pałońnikaŭ u žniŭni pryludna abraziŭ troch miascovych pradprymalnikaŭ i hałoŭnaha sanitarnaha doktara rajona za zaniatuju imi inšuju hramadzianskuju pazicyju, paviedamlaje 6tv.by. Vybačeńniaŭ ad kiraŭnika rajona jany tak i nie dačakalisia. Z-za hetaha biznesmieny źviarnulisia ŭ milicyju, a taksama viarnuli ŭ rajvykankam raniej uručanyja im šmatlikija padziaki.

Jak raspaviali karespandentu «Mahiloŭskaha rehijonu» pradprymalniki Alaksandr Kalin, Raman Krukoŭski, Siarhiej Pisarenkaŭ, a taksama hałoŭny sanitarny doktar Kruhlanskaha rajona Alaksiej Cyhankoŭ, svaje vykazvańni ŭ adras biznesmienaŭ Pałońnik zrabiŭ na praŭładnaj manifiestacyi, jakaja adbyłasia 19 žniŭnia. Pałońnik, a taksama kiraŭnik spraŭ Kruhlanskaha rajvykankama Mirasłaŭ Arsoba, prachodziačy mima abjektaŭ Kalina, kryčali «Fašyzm nie projdzie!», «Hańba!». Dalej pra «hańbu» piersanalna Kalinu, Krukoŭskamu i Pisarenkavu zajaŭlałasia kiraŭnikom rajona na mitynhu la miascovaha doma kultury.

U svaju čarhu Cyhankova Pałońnikaŭ hołasna nazvaŭ «palityčnaj prastytutkaj» na naradzie ŭ rajvykankamie 17 žniŭnia.

Pradprymalniki i sanitarny ŭrač dali čas kiraŭniku rajona na pryniasieńnie publičnych prabačeńniaŭ, ale tak ich i nie pačuli, choć, pa raskazach aburanych kruhlancaŭ, vysokapastaŭleny čynoŭnik abiacaŭ heta zrabić. 3-ha vieraśnia jany adnieśli kalektyŭny zvarot u milicyju, u jakim zapatrabavali dać pravavuju acenku dziejańniam staršyni rajvykankama i inšych asob na pradmiet najaŭnaści ŭ ich złačynstvaŭ pa artykułach 130 (Raspalvańnie sacyjalnaj varožaści abo varožaści), 186 (Pahroza zabojstvam, pryčynieńniem ciažkich cialesnych paškodžańniaŭ abo źniščeńniem majomaści), 188 (Paklop) i 189 (Abraza) Kryminalnaha kodeksa.

Siońnia, 4 vieraśnia, Kalin, Krukoŭski, Pisarenkaŭ i Cyhankoŭ prynieśli i pakłali na hanak budynka rajvykankama svaje šmatlikija hramaty i padziaki, u rozny čas atrymanyja ad rajonnaj ułady.

Клас
Панылы сорам
Ха-ха
Ого
Сумна
Абуральна