Haspadar — Andrej Komlik-Jamacin. Jon byŭ viadomy jak fihurant «spravy Patryjotaŭ», ciapier Andrej — rabočy MMZ.
Jak tak vyjšła, što jaho Opiel trapiŭ u milicejskuju spravazdaču?
«Ja pryjechaŭ da Motavieła, pryparkavaŭsia tam — damaŭlalisia ź siabrami pajści pahulać pa praśpiekcie, — raskazvaje Andrej. — Vychodzim — praśpiekt pierakryty. Ustupać u kanflikt ź milicyjaj nie chaciełasia, tamu pajšli nazad, pa darozie pačalisia zatrymańni, ja vyrašyŭ viarnucca da mašyny. A jaje niama!
Ja ŭ panicy: uhnali?! Zvaniu ŭ milicyju, mnie tam kažuć, što treba čas vyśvietlić i pravieryć. Dobra, pakul čakaŭ zvanku, pajšoŭ u susiedniuju kramu paprasić zapisy z kamier».
Sa słoŭ Komlika-Jamacina, na videa jon ubačyŭ, jak mašynu atačyli ludzi ŭ čornym, potym pryjechała DAI i evakuatar.
«A tut pierazvońvajuć, što, sapraŭdy, mašyna na štraf-stajancy ŭ Leninskim RUUS. Nu, u mianie pieršaja dumka: parušyŭ niejki punkt PDR. Zabirać «Opiel» ja siońnia nie pajechaŭ, bo ŭ dziadźki dzień narodzinaŭ, ja pajechaŭ jaho vinšavać,
a papiarovuju vałakitu ź viartańniem vyrašyŭ pakinuć na zaŭtra», — kaža Andrej.
A potym jon ubačyŭ svaju mašynu ŭ paviedamleńni MUS.
«U internecie hladžu — maju mašynu pakazvajuć! Uskrytaja jana, pišuć, što «kiroŭca źbieh». Rečy ŭ bahažniku tak žyvapisna raskładzieny dla karcinki. Ale adkul ja źbieh? Nie było takoha! Ja ŭvohule nie viedaŭ što zdaryłasia z majoj mašynaj, pakul nie pahladzieŭ zapisy z kamier», — kaža jon.
Komlik-Jamacin nie admaŭlaje, što rečy ŭ bahažniku jahonyja.
«U mianie ŭ sałonie lažaŭ vialiki BČB-ściah, moža jon i vyklikaŭ intares orhanaŭ, što jany vyrašyli mašynu zabrać, a potym i ŭskryć. I siakiera maja, i nož moj: ja aktyŭny turyst, u mianie takija rečy jość u mašynie, i što? Nalepki «Zabastoŭka» taksama maje — heta nie dla raspaŭsiudu, a da mianie trapili ŭ vyniku raspaŭsiudu, nu ja ŭziaŭ sabie», — dadaje jon.
«Hetaje zdareńnie ja vielmi niehatyŭna aceńvaju: ź jakoj nahody mašynu voś tak prosta zabirać, uzłamyvać, a potym jašče pakazvać u internecie? Zakony prosta abražajucca takimi vychadkami».
Siońnia mužčyna płanuje zabrać svaju majomaść.
