U niadzielu ŭ Minsku ludzi skakali ŭ vadu, kab adarvacca ad siłavikoŭ, jakija razhaniali pratestnaje šeście ŭ rajonie Pałaca Niezaležnaści. Niekalki čałaviek skoknuli ŭ Śvisłač, ich padabraŭ katar ASVOD. TUT.BY adšukaŭ adnaho z chłopcaŭ, jon raspavioŭ, što heta było.
Na fota — Alaksandr Papłaŭski i jaho dziaŭčyna. Chłopcu 26 hadoŭ, kaža, što ŭdzielničaŭ u siońniašnim šeści. Pryjšli da barjera, jaki niepadalok ad Pałaca Niezaležnaści vybudavali siłaviki, «pastajali tam chvilin 40».
Fota: pradastaŭlena Alaksandram Papłaŭskim
— Bačyŭ, jak niejkaha chłopca zaciahvajuć za svoj kardon ludzi ŭ vajskovym kamuflažy. Mnie padałosia, što pačuŭ niejkija ŭdary. Stajali i ludzi ŭ cyvilnym — ja zrazumieŭ, što heta taksama siłaviki.
Kali pratestoŭcy stali razychodzicca, pačalisia zatrymańni. Ludzi ŭ formie rušyli na pratestoŭcaŭ, źjaviŭšysia z-za zaharodki.
— Spačatku my stali ŭ sčepku, nas było vielmi mała, čałaviek 12. Baču, što siłaviki ruchajucca na nas sa ščytami. Kali pačali ludzi biehčy — i my taksama pabiehli. Potym my zaŭvažyli, što z druhoha boku — aŭtazaki.
Alaksandr kaža, što ludzi pabiehli ad siłavikoŭ u bok vady. Zaŭvažyli katar, dva čałavieki zabiehli na jaho.
— Katar pačaŭ adpłyvać. Niejki mužčyna skočyŭ u vadu — jaho vyciahvali. I ja taksama skočyŭ, padpłyŭ i mianie taksama vyciahnuli. A dalej ja bačyŭ, jak zatrymlivali tych, chto zastaŭsia. Ich mocna šturchali. Niekatoryja taksama skakali ŭ vadu. U katary nas było čatyry čałavieki. A ŭ vadzie ja bačyŭ, moža, čałaviek dzieviać — ale nie ździŭlusia, kali na samaj spravie ich było bolej. Skakali, tamu što razumieli — inakš zatrymajuć.
Chłopiec kaža, što dahaniali pratestoŭcaŭ nieviadomyja ŭ cyvilnym i milicyja — niekalki dziasiatkaŭ čałaviek. Uzdoŭž praśpiekta Pieramožcaŭ stajali aŭtazaki.
U katary nijakich razmoŭ nie viali, tłumačyć Alaksandr, jon navat nie zrazumieŭ, što pobač — supracoŭniki ASVOD. Źmierzłym ludziam dali pled i advieźli na inšy bierah.
— Prajšoŭ niejkuju adlehłaść, mokry, da mašyny. Paprasiŭ telefon, pazvaniŭ svajoj dziaŭčynie.
Alaksandr dadaje, što aburany situacyjaj u krainie.
— Adbyvajecca niezakonnaść, chłuśnia i zapužvańnie.
Pavodle infarmacyi TUT.BY, supracoŭnikaŭ źmieny ASVOD, jakija dapamahli ludziam, što skoknuli ŭ vadu, dastavili ŭ RUUS Centralnaha rajona. Tam jany dajuć tłumačeńni nakont taho, što adbyłosia. Pakul nieviadoma, ci zatrymanyja jany.