Cieła 25-hadovaha Alaksieja Dziamidava znajšli na ŭskrajku mikrarajona Sierabranka ranicaj 5 vieraśnia. Abstaviny jaho śmierci niezrazumiełyja navat blizkim svajakam.
«Alaksiej žyŭ z baćkami ŭ Baraŭlanach, pracavaŭ na aŭtamyjcy va Uruččy. 4 vieraśnia vyjšaŭ na pracu. Pozna ŭviečary maci zvaniła jamu, usio było narmalna, ale ŭžo praz hadzinu to nichto nie braŭ słuchaŭku, to vyklik skidvali.
A ranicaj 5 vieraśnia nam paviedamili, što znajšli cieła Alaksieja», — raskazaŭ «Našaj Nivie» Alaksandr, stryječny brat chłopca.
Brat kaža, što ŭ morhu baćkam nie pakazvali cieła — tolki tvar. Paśla jany razhladali cieła syna ŭžo doma.
«Cialesnyja paškodžańni byli. Na hałavie hiematoma, na baradzie nibyta kavałki skury vydranyja. Palcy źbityja, kostki źbityja na rukach. Naha niejak pierakručanaja — niby złamanaja. Brudnaja vopratka… Vyhladaje, što była bojka ci niešta takoje, — miarkuje Alaksandr. — Aficyjnaje zaklučeńnie ab śmierci budzie praź miesiac.
A ŭ papiarednim, kažuć, napisali, što pryčyna śmierci — atručvańnie nievyjaŭlenym rečyvam».
Historyja dziŭnaja. Uskładniajecca jašče i tym, što zahinuły Alaksiej byŭ udzielnikam fanackaha ruchu — zaŭzieŭ za «Dynama».
«Ja sam brata pryvioŭ u dźviž, možna skazać. Paśla jon zastaŭsia ŭ im, ja adyjšoŭ. Niejkim nadta ŭžo aktyŭnym fanatam Alaksiej nie byŭ. Ale apranaŭsia adpaviedna: spartovy styl, vidać, što fanat.
Alaksiej byŭ spartyŭnym chłopcam, baksioram. Suprać dvaich-traich moh by vystajać albo adbicca i źbiehčy. Plus u tym rajonie, dzie jaho znajšli, jamu niama čaho było rabić.
U mitynhach jon nie ŭdzielničaŭ — ja b viedaŭ. Dy i 4 vieraśnia nie było mitynhaŭ.
Taksama źnikli jaho rečy. U morhu kazali, što jany ŭ milicyi, u milicyi — što ŭ morhu. A ŭ vyniku telefona i zaplečnika prosta niama, — kaža brat. —
A atručvańnie mahli paśla napisać, bo ŭ 2016 hodzie Alaksiej trapiŭsia za toje, što sprabavaŭ spajsy. Jaho nie pasadzili, tam sadžać nie było za što. Ale na ŭlik niejki pastavili».
Ale važna: siamja zahinułaha Alaksieja adznačaje, što na ciele śladoŭ ad kajdankoŭ niama, śladoŭ ad udaraŭ dubinkaj taksama. I brat padkreślivaje: słovy pra siłavikoŭ tolki viersija, dokazaŭ niama.
Śledčy kamitet prakamientavaŭ hety vypadak tak: «Pa fakcie śmierci pravodzicca pravierka, dakładnyja abstaviny vyśviatlajucca. Dla vyznačeńnia dakładnaj pryčyny śmierci pryznačanyja sudova-miedycynskija ekśpiertyzy».
Pa słovach śledčych, cieła było znojdziena biez bačnych cialesnych paškodžańniaŭ. «Papiarednie śmierć nie nosić kryminalnaha charaktaru», — paviedamlaje SK.
Pachavali Alaksieja Dziamidava 7 vieraśnia.
Heta ŭžo druhaja zahadkavaja śmierć maładoha chłopca, źviazanaha z fanackim rucham. 22 žniŭnia na vulicy Parnikovaj u Minsku znajšli paviešanym cieła Mikity Kryŭcova, jaki 10 dzion ličyŭsia źnikłym. Kryŭcoŭ byŭ fanatam FK «Maładziečna», jaho źniknieńnie ździviła ŭsich. U suicyd svajaki nie pavieryli.
