Zhodna sa źviestkami milicyi, u Maršy adzinstva ŭ Hrodnie 6 vieraśnia pryniało ŭdzieł kala 750 čałaviek. Zatrymali i dastavili ŭ RAUS 102 čałaviek, u dačynieńni da ich pačali administracyjny praces za ŭdzieł u niesankcyjanavanym masavym mierapryjemstvie (art. 23.34 KaAP). Amal usich adpuścili, niekalki čałaviek čakajuć suda ŭ RAUSie, paviedamili Hrodna.life u pres-słužbie UUS Hrodzienskaha abłvykankama.
— Asobnyja radykalna nastrojenyja hramadzianie rušyli z płoščy Savieckaj u bok praśpiekta Janki Kupały. Jany vyjšli na prajeznuju častku, tym samym błakavali ruchi transpartnym srodkam. Na nieadnarazovyja patrabavańni spynić supraćpraŭnyja dziejańni častka hramadzian nie reahavała. U bok supracoŭnikaŭ milicyi palacieli pałki, płastykavyja butelki i kamiani, — raspavioŭ Jaŭhien Dudko z pres-słužby UUS Hrodzienskaha abłvykankama telekanału «Hrodna Plus».
— Milicyja nie źbivała hramadzian, — paviedamili Hrodna.life u pres-słužbie UUS Hrodzienskaha abłvykankama.
— Ludziej ciahnuli pa asfalcie, užyli dubinki, dušyli — jak heta možna nazvać?
— Milicyja nie źbivała hramadzian. Papiarednie jany nieadnarazova papiaredžvalisia padčas ruchu infarmacyjnaj hrupaj pra toje, što ŭdzielničajuć u niesankcyjanavanym mierapryjemstvie. Ludzi vychodzili na prajeznuju častku, błakavali ruch transpartnych srodkaŭ. Paśla nieadnarazovych patrabavańniaŭ spynić udzieł u masavych biesparadkach byli zatrymańni.
— Čamu milicyja vykarystała haz?
— Mirnyja hramadzianie, jakija ŭdzielničali ŭ niesankcyjanavanym mierapryjemstvie, taksama vykarystoŭvali haz. Supracoŭniki AMAP pry zatrymańni majuć prava vykarystoŭvać i fizičnuju siłu, i śpiecyjalnyja srodki.
— Čamu braniravany pazadarožnik źjaviŭsia na płoščy Savieckaj, choć Vadzim Siniaŭski, načalnik UUS Hrodzienskaha abłvykankama, raniej abiacaŭ, što vajskovaj techniki ŭ horadzie nie budzie?
— Ja nie mahu na hetaje pytańnie adkazać, ja jaho nie bačyŭ.
Uviečary 6 vieraśnia ŭ internecie źjaviŭsia zdymak unutranaha dvara RAUS Kastryčnickaha rajona. Va UUS Hrodzienskaha abłvykankama rastłumačyli, što paśla dastaŭleńnia častku ludziej paviali ŭ kabiniety, častka zastalisia stajać u «čarzie».
U pres-słužbie Hrodna.life skazali, što byŭ zatrymany adzin niepaŭnahadovy. «Byŭ zatrymany i adrazu ž adpuščany dadomu da mamy i taty. Pašparty ŭ jaho nie było, vizualna jamu było hadoŭ 15-16. Jaho vyrvali z natoŭpu, pahladzieli i skazali: «Davaj, chutčej, dadomu da baćkoŭ».
— Kali supracoŭniki AMAP syšli zatrymlivać udzielnikaŭ u dvary, jak jany razumieli, dzie ŭdzielnik akcyi, a dzie vypadkovy čałaviek?
— Heta taktyka dziejańniaŭ supracoŭnikaŭ AMAPa. Jak u dvor zachodzili, jak identyfikavali — heta da supracoŭnikaŭ AMAPa.
Praktyčna ŭsich paśla zatrymańnia adpuścili. Siarod zatrymanych byli i mužčyny, i žančyny. U RAUSie da suda zastalisia ludzi, jakich raniej užo zatrymlivali za ŭdzieł u niesankcyjanavanych mierapryjemstvach. Stolki ich, nie skazali, ale heta «adzinki».
