«Mama da hetaha času ŭ šoku ad taho, što adbyłosia, ale milicyja nie prasiła ŭ jaje prabačeńnia, jany joj navat nie zvanili», — paviedamiŭ AUTO.TUT.BY Ihar, syn žančyny, jakuju ŭčora na vulicy Cimirazieva zakruciła ŭ kalučy drot paśla taho, jak jaho na poŭnym chadu parvali matacykły DAI. Adnak paśla publikacyi materyjału stała viadoma, što kiraŭnictva «Strały» pieraprasiła žančynu.

Učora siłaviki pierakryvali vulicy kala HC «Zamak»: dla piešachodaŭ i transpartu byli zabarykadavany praśpiekt Pieramožcaŭ i vulica Cimirazieva.

Minčanin Dźmitryj viartaŭsia z pajezdki ŭ svaju kvateru na praśpiekt Pieramožcaŭ. Z-za taho, što na Cimirazieva byŭ pierakryty ruch transpartu, chłopiec vymušany byŭ iści adrezak šlachu pieššu. Kala T-padobnaha skryžavańnia, pobač z vulicaj Sapioraŭ, piešachod upiorsia ŭ zaharodu: papiarok prajeznaj častki i tratuara stajali bajcy, byŭ raściahnuty kalučy drot.

Chłopiec adznačyŭ, što takich, jak jon, było kala tryccaci čałaviek, prajści ludziam było niemahčyma. Dźmitryj paviedamiŭ, što ŭ asnoŭnym heta byli žychary damoŭ ź bližejšych vulic, jak moładź, tak i pažyłyja. Siłaviki nikoha nie puskali, nie pamahaŭ navat pašpart z prapiskaj, ludziam skazali čakać viečara, pakul usio razyducca. Pry hetym abyści pierakryty ŭčastak było nierealna.

— Tut na chutkaści kala 100 km/h niasucca dva matacykły. Ja spačatku dumaŭ, što jany niejkija dziorzkija — jeduć na takoj chutkaści. Heta byli daišnyja bajki BMW. Na chutkaści jany prosta razarvali zaharodu z kalučaha drotu. Hety drot byŭ ciomnaha koleru i źlivaŭsia z asfaltam. Napeŭna z-za vialikaj chutkaści matacyklisty prosta nie paśpieli zreahavać, — raspavioŭ Dźmitryj.

Pa słovach vidavočcy, matacyklisty prataranili kalučku, parvali jaje, ale bajki nie zvalilisia. Drot łopnuŭ i «adstrelnuŭ» u ludziej, jakija stajali pobač.

— Vielmi paciarpieła adna žančyna. Vidavočna, jana viartałasia z kramy: z pakieta, jaki razarvaŭsia, vypali i raźbilisia jajki, kukuruza. Samu žančynu litaralna nakryła drotam. Jana pačała ściakać kryvioj, i było vidać, što znachodzicca ŭ šoku. Jana navat nie mahła havaryć — na paru siekund vyklučyłasia.

Pobač apynułasia mašyna chutkaj dapamohi, miedyki jakoj akazali pieršuju dapamohu paciarpiełaj. Paśla jaje pavieźli ŭ balnicu.

— Matacykły DAI spynilisia, da ich padjechaŭ patrulny aŭtamabil DAI. Adzin z matacyklistaŭ padjechaŭ da kamandzira bajcoŭ, kab daviedacca, jak tam zaharoda! Ludzi pačali kryčać, kab jon choć by prabačeńnia paprasiŭ u paciarpiełaj žančyny, ale jon prosta raźviarnuŭsia i źjechaŭ.

Pa słovach vidavočcy, aŭtamabil DAI taksama źjechaŭ ź miesca zdareńnia. Supracoŭniki milicyi nie stali apytvać śviedak, nie pierapisali ich danyja. Dapamahali vyzvalić paciarpiełuju ad drotu siłaviki ŭ čornym abmundziravańni.

AUTO.TUT.BY źviazaŭsia z paciarpiełaj 62-hadovaj minčankaj. Adnak žančyna ciapier znachodzicca ŭ ciažkim maralnym stanie i ad razmovy z žurnalistami admoviłasia. Ab tym, što adbyłosia, ź jaje słoŭ raspavioŭ syn Ihar.

— Mama žyvie na vulicy Čyhładze. Učora jana jeździła pa pakupki. Z-za pierakryćcia daroh u horadzie jana dabirałasia dachaty kołami. Z vakzału padjechała na 69 aŭtobusie bližej da Cimirazieva, a adtul pajšła pieššu, — raspavioŭ mužčyna.

Kali žančyna ŭpierłasia ŭ aharodžu z kalučaha drotu, to padyšła da milicyi daviedacca, jak joj dabracca dadomu. U hety momant matacykły i zajechali ŭ «kalučku».

— Drot pakaciŭsia ŭ bok piešachodaŭ, tudy, dzie stajała mama. Moładź adskočyła, a mama nie paśpieła — jaje abmatała drotam, jana ŭpała.

Miedyki chutkaj na miescy akazali dapamohu paciarpiełaj. Pa słovach Ihara, milicyjaniery nastajali na špitalizacyi, bo žančyna była ŭ šoku.

— Zavieźli ŭ 6-ju balnicu, nakłali na nohi dva švy, zrabili zdymki — surjoznych traŭmaŭ niama. Na ciele jašče šmat drapin. Ciapier mama doma.

Pa paviedamleńni syna žančyny, u špitali jana admoviłasia vyklikać milicyju i sama zajavu nie padavała.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?