Za apošni čas u Miensku zarehistravany dva vypadki elektratraŭmatyzmu ŭ tralejbusach. Pieršy skončyŭsia trahična — ad atrymanych paškodžańniaŭ pieršakurśnica peduniversytetu imia M.Tanka pamierła na miescy. U druhim vypadku achviaru paškodžanaj u tralejbusie izalacyi vyratavaŭ inšy pasažyr. Student piataha kursu BNTU atrymaŭ elektraapioki ruk.
Pa faktach zdareńniaŭ pravodzicca pravierka. Tralejbus, pry pasadcy ŭ jaki zahinuła studentka, staić u depo №4, da jakoha naležyć, druhi ž praciahvaje vazić pasažyraŭ. Pryčym kiroŭca tralejbusa, jaki byŭ śviedkam apošniaha zdareńnia, nia vyjšaŭ pacikavicca losam paciarpiełaha, a pradoŭžyŭ ruch pa maršrucie.
Niekatoryja pasažyry i raniej zaŭvažali, što tralejbusy čas ad času «bjucca tokam» pry pasadcy i vysadcy. Usia sprava tut va ŭciečkach elektryčnaści na metalovy korpus, jakija mohuć zdaracca pry parušeńni izalacyi ci prabojach u tym ci inšym miescy. Prosta jedučy ŭ tralejbusie, vy hetaha nijak nie adčujecie — udar tokam mahčymy tolki pry adnačasovym kantakcie z metaličnymi detalami tralejbusa i ziamloj. Uzimku stanovišča paharšajuć vilhotnaść i asabliva sol, jakoj darožnyja słužby pasypajuć darohi, — jana pavialičvaje tokapravodnaść i, traplajučy ŭ vuzły tralejbusa, pavyšaje imaviernaść uciečak. Specyjalisty nia rajać pasažyram u mokrym abutku dakranacca hołymi rukami, stojačy na ziamli, da metaličnych kanstrukcyj tralejbusaŭ. Bolš biaśpiečnyja ŭ hetym planie biełaruskija mašyny novych madelaŭ, jakija vypuskajucca ź siaredziny 1990-ch hadoŭ: u ich častka vysakavoltnaha elektraabstalavańnia raźmieščana na dachu, a nie pad padłohaj. Da taho ž jany nie takija amartyzavanyja.
Paviedamleńni pra ŭdary tokam u tralejbusach zredku prychodziać i z abłasnych centraŭ, adnak zdareńnie ź letalnym zychodam zarehistravana ŭpieršyniu: adyhraŭ rolu fatalny źbieh akaličnaściaŭ.
