Žychar Minska, što vykinuŭ z vyšyni 24-ha paviercha sabaku i ŭłasnuju dačku, a zatym skončyŭ žyćcio samahubstvam, u dzień trahiedyi byŭ mocna pjany. Pra heta ŭ efiry «Radyjo-Minsk» raspaviała aficyjny pradstaŭnik Śledčaha kamiteta Julija Hančarova.
Čytajcie taksama: Minčuk vykinuŭ z 24 paviercha dačku z sabakam, a paśla vykinuŭsia sam
Nahadajem, incydent zdaryŭsia 30 červienia na vulicy Hrybajedava. U dvary doma znajšli cieły dziciaci i mužčyny z prykmietami padzieńnia z vyšyni. Tut ža znajšli i sabaku biez prykmiet žyćcia.
Vyśvietliłasia, što 33-hadovy minčuk znachodziŭsia doma sa svajoj małaletniaj dačkoj. U niejki momant jon sabraŭ rečy svajoj byłoj sužycielki i padpaliŭ ich u vannym pakoi, a paśla hetaha ŭziaŭ svaju vaśmimiesiačnuju dačku i sabaku parody toj-terjer i nakiravaŭsia na ahulny bałkon 24-ha paviercha. Spačatku mužčyna skinuŭ z bałkona chatniuju žyviołu, potym dačku, a paśla skoknuŭ sam.
Sudova-miedycynskaja ekśpiertyza ŭstanaviła, što ŭ momant zdareńnia minčuk byŭ mocna pjany (uzrovień ałkaholu ŭ kryvi składaŭ 2 pramile). Zhodna z zaklučeńniem paśmiarotnaj psichołaha-psichijatryčnaj ekśpiertyzy, u mužčyny nie było psichičnych parušeńniaŭ, adnak u pieryjad da śmierci jon adčuvaŭ vyjaŭlenaje emacyjanalnaje napružańnie, abumoŭlenaje ŭnutryasabovym kanfliktam.
