Estonski film «Praŭda i spraviadlivaść», 23 kastryčnika
Nahody ździŭlacca, jakija cudy moža stvarać kiniematahrafija maleńkaj Estonii, źjaŭlajucca rehularna. Na «Paŭnočnym źziańni» jość mahčymaść ubačyć adzin ź ich — «najlepšy estonski film 2019 hoda» «Praŭda i spraviadlivaść» režysiora Tanela Tooma, jaki ŭ svaju čarhu ŭ svajoj krainie byŭ nazvany «čałaviekam hoda». Karcina pastaviła absalutny rekord u estonskim prakacie: pa kolkaści hledačoŭ jana abyšła ŭsie mahčymyja halivudskija błokbastary i ŭ rešcie była vysunutaja na suiskańnie premii «Oskar», praŭda, u šort-list nie trapiła. Film źniaty pa adnajmiennaj knizie i adpraŭlaje hledača ŭ XIX stahodździe, dzie hałoŭny hieroj nabyvaje ziamlu ŭ apantanaj nadziei na joj uzbahacicca, ale niešta idzie nie pa płanie.
Narviežskaja dakumientałka «Arktyčnyja viarbludy», 24 kastryčnika
Heta miły i malaŭničy film, dzie hałoŭnyja hieroi — Turaryn i jaho siastra Svalin z paŭnočnaha narviežskaha horada — raskazvajuć ab pryhodach sa svaimi chatnimi hadavancami viarbludami, jakich baćki im padahnali zamiest čakanych koniej. Viarbludy pobač z kaladnaj jalinkaj akazalisia niedarečnym spałučeńniem, tamu siamja adpraviłasia ŭ padarožža ŭ Manholiju, kab znajści taho, chto pahodzicca dapamahčy ŭ vychavańni hetych žyvioł. A pakolki dla kino hałoŭnaje — nie meta, a sam praces, usie mahčymyja krajavidy i siužetnyja pavaroty tut prychodziacca nadzvyčaj darečy.
Dyskusija «Na krai» ab pracy ŭ haračych miescach z udziełam biełaruskaha fatohrafa, 26 kastryčnika
«Paŭnočnaje źziańnie» pakaža dacki dakumientalny film «Vajenny fatohraf», u jakim režysior Borys Biendžamin Biertram raskazvaje pra Jana Hrarupa, jaki imkniecca stać najlepšym vajennym fatohrafam i paralelna vychoŭvaje čatyroch dziaciej. A paśla filma budzie arhanizavanaja anłajn-dyskusija ab pracy fotareparcioraŭ u haračych miescach i pryhažość na vajnie. U razmovie voźmuć udzieł ułasna režysior Borys Biendžamin Biertram, a taksama biełaruski niezaležny fatohraf Alaksandr Vasiukovič, jaki ŭ 2014 hodzie zdymaŭ u zonie ATA na ŭschodzie Ukrainy. Maderataram dyskusii stanie kulturołah Maksim Žbankoŭ.
Dakumientalny film «Fieministarka», 27 kastryčnika
Niekatoryja, mahčyma, pamiatajuć Marhot Valstrom pa jaje śmiełych vykazvańniach i ŭstojlivaj pazicyi — režysior Viktar Nordenšeld zrabiŭ film pra čatyry hady jaje kiravańnia na pazicyi ministarki zamiežnych spraŭ Šviecyi. Karcina pakazvaje žančynu-palityka ŭ jaje naturalnym asiarodździ — u vybudoŭvańni mižnarodnych stasunkaŭ z Saudaŭskaj Aravijaj, Izrailem i Paŭnočnaj Karejaj i pracy na zachavańnie miru va ŭsim śviecie.
Almanach biełaruskich dakumientałak «Na suviazi», 29 kastryčnika
Na praciahu niekalkich hadoŭ naša nacyjanalnaja kinastudyja davała mahčymaść maładym aŭtaram ažyćciavić na «Biełaruśfilmie» svaje idei ŭ vyhladzie karotkamietražak i źbirała heta ŭ štohadovyja almanachi. Apošnim ź ich staŭ zbornik «Na suviazi», kudy ŭvajšli filmy čatyroch režysioraŭ pra rolu internetu ŭ sučasnym žyćci. U rabocie Alesia Łapo «Usie mierapryjemstvy pa płanie», naprykład, raskazvajecca pra dyrektara sielskaha Doma kultury Dzianisa Daškieviča, jaki prydumaŭ arhanizavać kampjutarnyja kursy dla pažyłych ludziej, a pakul zaachvočvaŭ viaskoŭcaŭ imi skarystacca, ubačyŭ, što biełaruskaj hłybincy ŭvohule nie da cyvilizacyi.
Aproč «Na suviazi», na «Paŭnočnym źziańni» buduć pakazany biełaruskija filmy «Epitafija» Viktara Aśluka, «Mnie treba pociskaŭ» Andreja Kuciły, «Miežy» Juli Šatun, «Šlach dadomu» Arcioma Łobača i inšyja — usiaho vosiem štuk.
Usie filmy dastupnyja da prahladu ciaham sutak, fiestyval projdzie da 29 kastryčnika. Raskład pakazaŭ i mierapryjemstvaŭ možna pahladzieć tut.
