Dźmitryj Kułakoŭski jašče niadaŭna ŭznačalvaŭ kryminalny vyšuk u Zavodskim RUUS Minska. Paśla vybaraŭ zajaviŭ, što nie zhodny ź dziejańniami ŭłady. U vieraśni pryniali jaho rapart na zvalnieńnie. A nieŭzabavie abviaścili padazravanym pa spravie ŭ abrazie. Jaho zatrymali niedaloka ad doma — za «niepadparadkavańnie» jon atrymaŭ 12 sutak aryštu. U znak pratestu Dźmitryj prahłynuŭ čatyry mietaličnyja pradmiety. Ale na volu jon nie vyjšaŭ, na jaho skłali novy pratakoł, znoŭ za «niepadparadkavańnie», i dali ŭžo 15 sutak. Były milicyjanier, pa słovach žonki, utrymlivajecca ŭ karcary, dzie spać jon moža na taburetcy abo bietonnaj padłozie, piša Tut.by.

Akreścina.

Akreścina.

Julija Kułakoŭskaja raspaviadaje, što Dźmitryj pracavaŭ u milicyi z 2006 hoda. Doma zachoŭvajucca padziaki i prafiesijnyja ŭznaharody.

Jak prahučyć paźniej u sudzie pa administracyjnaj spravie, pierad vybarami na Dźmitryja pryjšoŭ dakumient z upraŭleńnia ŭłasnaj biaśpieki, što jon «palityčna niadobranadziejny».

Jašče da zatrymańnia była zaviedziena kryminalnaja sprava pa fakcie abrazy supracoŭnika milicyi. Dźmitryj Kułakoŭski prachodziŭ padazravanym pa spravie. Doma ŭ jaho praviali pieratrus, zabrali niekatoruju techniku. Adnak paśla pieratrusu, pa słovach rodnych, jaho nie zatrymlivali. Žonka kaža, što Dźmitryj nie pryznavaŭ siabie vinavatym.

6 kastryčnika jaho zatrymali niedaloka ad doma. Zhodna z materyjałami administracyjnaj spravy, Kułakoŭski akazaŭ niepadparadkavańnie supracoŭniku ŭpraŭleńnia ŭłasnaj biaśpieki Hvaździu Ł.Ju. — byŭšy padazravanym u ździajśnieńni złačynstva admoviŭsia zaśviedčyć asobu abo (mienavita ŭ takoj farmuloŭcy «abo» ŭ pratakole) admoviŭsia prajści ŭ RUUS, chapaŭsia za bardziur.

Dźmitryj Kułakoŭski ŭ sudzie Maskoŭskaha rajona zajaviŭ, što ničoha padobnaha nie rabiŭ. Sudździa Siarhiej Kacar pryznačyŭ jamu 12 sutak aryštu.

Toj sud prajšoŭ biez advakata, svajaki taksama daviedalisia pra rašeńnie postfaktum.

18 kastryčnika Julija Kułakoŭskaja z baćkam i siabroŭkaj pryjechali na Akreścina, kab sustrakać Dźmitryja, jaki ŭ 16.15 pavinien byŭ vyjści na volu. Rodnyja prabyli kala izalatara da 22 hadzin.

— Ja paprasiła pryjechać advakata, i ŭžo joj skazali, što Dźmitryj zatrymany pa novym pratakole. Jak my potym vyśvietlili, jamu napisali, što vyjšaŭ ź IČU i akazaŭ niepadparadkavańnie supracoŭniku Savieckaha RUUS, za što jaho i zatrymali.

Na nastupny dzień adbyŭsia praces u sudzie Savieckaha rajona. U materyjałach spravy adznačajecca, što praź piać chvilin paśla vyzvaleńnia pa pieršym administracyjnym aryšcie Kułakoŭskaha spyniŭ dla vyśviatleńnia asoby učastkovy milicyjanier Savieckaha RUUS Lubimaŭ. Ale Dźmitryj admaŭlaŭsia sieści ŭ słužbovy aŭtamabil, za što jaho i zatrymali. Dźmitryj zajaviŭ u sudzie, što ŭ nazvany čas (16:20) jon byŭ u IČU, niepadparadkavańnia nie akazvaŭ. Rodnyja vystupili śviedkami na pracesie, raspaviali, što da 22 hadzin znachodzilisia la izalatara na Akreścina, adkul Dźmitryj nie vychodziŭ. Sudździa Maryna Fiodarava pryznačyła aryšt na maksimalna mahčymy pavodle art. 23.4 KaAP termin — 15 sutak.

— Dźmitryj paśpieŭ skazać, što z momantu zatrymańnia i potym padčas adbyćcia aryštu 12 sutak jon znachodziŭsia ŭ karcary, — kaža advakat Natalla Tarasiuk. — Pa jakoj pryčynie jaho tudy źmiaścili, skazać nie moh, za plačyma ŭ jaho ŭ hety čas stajali supracoŭniki izalatara, razmaŭlali my pa skajpie. Nivodnaj pieradačy jamu nie dastavili, choć u žonki vopratku i pradukty dla jaho pryniali. Jon nie byŭ zhodny z zatrymańniem 6 kastryčnika, z tym, što jaho abvinavacili ŭ niepadparadkavańni, tamu ŭ znak pratestu prahłynuŭ čatyry mietaličnyja pradmiety. Pa-dobramu treba rabić renthien i hladzieć, u jakim jon stanie. Ale, pavodle jaho słoŭ, miedycynskaja dapamoha jamu nie akazvajecca. Trymajuć jaho ŭ karcary, dzie łožak pryšpileny da ściany i dniom, i nočču, jość adzinaje kresła, na jakim jon siadzić 12 sutak i nie śpić. Kazaŭ, što apuchajuć nohi, u jaho cukrovy dyjabiet druhoha typu. Praz adsutnaść snu jamu ciažka skancentravać uvahu. Pytańni ja jamu zadavała pa dva razy. Za ŭvieś čas utrymańnia ŭ IČU ja jak advakat ni razu nie zmahła da jaho patrapić, mianie prosta nie puskajuć, tak što ja nie mahu navat pravieryć, u jakim jon fizičnym i psichałahičnym stanie.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?