Delfi.lt
Parłamient Litvy zaćvierdziŭ kandydaturu Inhrydy Šymanicie na pasadu premjer-ministra, paviedamlaje Delfi.
Šymanicie na pasadu premjera prapanavała pravacentrysckaja kaalicyja, jakaja pieramahła na parłamienckich vybarach. U jaje ŭvachodziać kansiervatary, libierały i Partyja svabody. U ich u Siejmie 73 mandaty z 141.
Za Šymanicie prahałasavali 62 deputaty, suprać — 10, a 41 ustrymaŭsia.
Šymanicie ŭ 2009-2012 hadach była ministram finansaŭ va ŭradzie kansiervatara Andrusa Kubilusa, pracavała ŭ kiravańni Banka Litvy (Centrabanka), uznačalvała parłamiencki kamitet aŭdytu. U parłamiencie minułaha sklikańnia jana ŭvachodziła ŭ frakcyju kansiervataraŭ, ale nie źjaŭlałasia siabram hetaj partyi. Jana naradziłasia ŭ Vilni ŭ 1974-m, źjaŭlajecca ekanamistam pa adukacyi. Kandydat u premjery viedaje anhlijskuju, polskuju, ruskuju i šviedskuju movy, u jakaści svajho zachapleńnia nazyvaje knihi.
Jana bałatavałasia na minułych prezidenckich vybarach, zdoleła abyści premjera Saŭlusa Skviarnialisa, ale prajhrała ŭ druhim tury Hitanasu Naŭsiedzie.
Darečy, heta nie pieršy vypadak u litoŭskaj historyi, kali premjeram stanovicca žančyna. U 1990-1991 hh. urad uznačalvała Kazimira Prunskienie, a ŭ 1999-m v.a. premjera paru tydniaŭ była Irena Dahucienie. A ŭ 2009-2019 hh. prezidentam była Dala Hrybaŭskajcie.