Novikava zatrymali jašče 6 červienia, kali jechaŭ na traktary la vioski Novyja Kavali Pastaŭskaha rajonu. Paśla pieraviali ŭ Miensk, dzie źmiaścili ŭ SIZA na vulicy Vaładarskaha, nahadvaje Radyjo Svaboda.
Novikaŭ udzielničaŭ u vybarčaj kampanii Śviatłany Cichanoŭskaj, źbiraŭ podpisy za jaje vyłučeńnie. Jaho abvinavacili pavodle taho ž artykułu, što i Siarhieja Cichanoŭskaha — č. 1 art. 342 KK (Arhanizacyja i padrychtoŭka dziejańniaŭ, jakija hruba parušajuć hramadzki paradak).
Infarmacyja ab mahčymym vyzvaleńni i departacyi Novikava, jaki źjaŭlajecca hramadzianinam Rasiei, źviłasia ŭ kancy minułaha tydnia.
3 śniežnia jon sam dasłaŭ paviedamleńnie ŭ hłybocki telehram-kanał, dzie raskazaŭ pra toje, jak apynuŭsia na voli.
«26 listapada byŭ vydvarany ź Biełarusi biez vykanańnia normaŭ zakanadaŭstva i prava, — raskazvaje Andrej Novikaŭ. — Biez vykanańnia pracedur. Vyviezieny ŭ tym, u čym byŭ letam zatrymany, sa ścipłym kłunkam rečaŭ, jakimi abžyŭsia ŭ SIZA na Vaładarcy. Byŭ vyviezieny trasaj M1 na miažu z Rasiejskaj Fiederacyjaj i tam pakinuty. Z rasiejskim pašpartam i štampam ab zabaronie na ŭjezd na terytoryju Biełarusi ciaham 10 hadoŭ»
Były palitviazień kaža, što jahonaja siamja zastałasia ŭ Biełarusi, jany pakul nia mohuć vyjechać. Małodšamu dziciaci Andreja paŭtara hoda, a žoncy nieabchodna naziracca ŭ lekara.
Aryšt admianili bieź nijakich tłumačeńniaŭ
«Moj status niezrazumieły, — kaža Andrej Novikaŭ. — Ja nia maju paćvierdžańnia taho, u jakim statusie ciapier znachodžusia ŭ kryminalnaj spravie. Aryšt byŭ admienieny bieź nijakich tłumačeńniaŭ, paśla čaho mianie vyvieźli nieviadomymi asobami. Adabrali ŭsie dakumenty, jakija ŭ mianie naźbiralisia padčas śledztva. Usiu pierapisku, asabistuju ŭ tym liku. Paštoŭki, listy padtrymki. Maje asabistyja natatki zabrali. Sabrali ŭ pakiet i zabrali, nieviadomaja asoba. Znachodžusia ŭ ciažkim stanie. Siamja zastałasia ŭ jakaści zakładnikaŭ».
Ciapier Novikaŭ znachodzicca na terytoryi Rasiei. Jon źbirajecca apubličvać svaju historyju, bo ličyć, što siamja ciapier znachodzicca ŭ zakładnikach.
«Kiraŭniki siłavych struktur pieravodziać adkaznaść adzin na adnaho, advakaty zapałochanyja, — havoryć jon. — Ja sam były siłavik, vydatna razumieju, u jakoj sytuacyi jany znachodziacca. Toje samaje adbyvajecca ŭ sudach. Usie skarhi, chadajnictvy, zajavy pieratvarajucca ŭ adpiski, jakija nia majuć nijakaj jurydyčnaj siły».
Andrej Novikaŭ taksama padziakavaŭ za padtrymku, jakuju adčuvaŭ, znachodziačysia ŭ SIZA.
Andrej Novikaŭ naradziŭsia ŭ biełaruskim Varapajevie, paśla škoły źjechaŭ vučycca ŭ Rasieju. Žyŭ na Dalokim Uschodzie, słužyŭ u milicyi, maje zvańnie padpałkoŭnika ŭ adstaŭcy. Dvojčy ŭdzielničaŭ u vajskovych aperacyjach na terytoryi Čačni.
