Paśla pieramohi revalucyi Hodnaści va Ukrainie bajcy ŭkrainskaha rasfarmavanaha śpiecpadraździaleńnia «Bierkut» uciakli nie tolki ŭ Rasiju i akupavanyja Krym i častku Danbasu, ale i ŭ Biełaruś. «Novy čas» padaje źviestki pra vyjaŭlenych eks-bajcoŭ «Bierkuta» na słužbie ŭ Biełarusi.
Jašče ŭ 2017 hodzie byli vyjaŭlenyja try ŭciekačy-«bierkutaŭcy» na słužbie ŭ biełaruskaj milicyi: Mikałaj Staharniak, Siarhiej Haŭrylak i Siarhiej Panasienka. Usie jany źjaŭlalisia bajcami AMAP HUUS Minharvykankama. Da hetaha pieraliku dadalisia imiony Dźmitryja Ancupava i Anatola Prymaka.
Siarhiej Panasienka
32-hadovy Siarhiej Panasienka — uradženiec Mikałajeŭskaj vobłaści Ukrainy. U listapadzie 2013 hoda ŭ składzie mikałajeŭskaha padraździaleńnia «Bierkuta» byŭ nakiravany ŭ Kijeŭ. Paśla pieramohi Majdana ŭciok u Biełaruś. Tut jon atrymaŭ hramadzianstva i słužbu ŭ minskim AMAPie.
Panasienka apaznany na supolnym fotazdymku, na jakim zafiksavany taksama kolišni «bierkutaviec» i bajec minskaha AMAPa Mikałaj Staharniak.
U 2017 hodzie Panasienka śviedčyŭ na administratyŭnym pracesie suprać Źmitra Daškieviča. Jon davodziŭ sudu, što aktyvist nibyta nie padparadkoŭvaŭsia patrabavańniam supracoŭnika milicyi, u vyniku čaho Daškieviča aštrafavali na 1150 rubloŭ.
Taksama vyznačana, što Panasienka niepasredna ŭdzielničaŭ u historyi z zatrymańniem dvuch bratoŭ, minčukoŭ Alaksandra i Viktara Kuŭšynavych. Abodva asobna adzin ad adnaho 15 lipienia 2020 hoda prybyli da budynku CVK, kab padać skarhu na nierehistracyju kandydataŭ u vybarčaj kampanii. Braty atrymali 10 i 11 sutak aryštu.
Siarhiej Haŭrylak
Taksama znojdzienaje dadatkovaje paćviardžeńnie pra słužbu ŭ minskim AMAPie jašče adnaho kolišniaha mikałajeŭskaha «bierkutaŭca» Siarhieja Haŭrylaka.
36-hadovy Siarhiej Haŭrylak taksama naradziŭsia ŭ Mikałajeŭskaj vobłaści USSR. U składzie «Bierkuta» byŭ nakiravany ŭ Kijeŭ u listapadzie 2013 hoda. Paśla pieramohi Majdana ŭciok razam ź siamjoju ŭ Biełaruś.
Viadoma, što 21 vieraśnia 2017 hoda Siarhiej Haŭrylak udzielničaŭ u zatrymańni anarchista Ramana Chaliłava. Zhodna sa słovami Chaliłava, amapaŭcy spynili jaho na vulicy dla vyśviatleńnia asoby, Raman daŭ im svoj pašpart, ale jaho ŭsio roŭna zatrymali i dastavili ŭ RUUS. U vyniku na padstavie śviedčańniaŭ amapaŭca Haŭłrylaka jamu prysudziać štrafu ŭ pamiery 15 bazavych vieličyń.
Pa vydalenych Siarhiejem Panasienkam sa svajho akaŭnta «VK» kantaktaŭ byli vyjaŭlenyja novyja imiony bajcoŭ śpiecpadraździaleńnia «Bierkut», jakija sa svajho mikałajeŭskaha «hniazda» pieralacieli nie tolki ŭ Biełaruś, ale i ŭ Rasiju, i na terytoryju akupavanaha joj Krymu.
Anatol Prymak
Naradziŭsia ŭ 1990 hodzie ŭ vioscy Ivaniŭka Arbuzynskaha rajona Mikałajeŭskaj vobłaści USSR. U «Bierkut» pa Mikałajeŭskaj vobłaści trapiŭ taksama paśla vojska. Razam ź inšymi tavaryšami pa słužbie ŭciok u Biełaruś paśla pieramohi revalucyi Hodnaści. Bajec AMAP HUUS Minskaha harvykankama.
U pole zroku Anatol Prymak trapiŭ jak kaleha «bierkutaŭca» Mikałaja Staharniaka. Mienavita ŭ takim statusie apošni paznačyŭ jaho ŭ śpisie kantaktaŭ svajho akaŭnta ŭ «VK».
Pad niknejmam akaŭnta padadzienaja infarmacyja z raździeła «Adukacyja», ź jakoj vynikaje, što Anatol Prymak navučaŭsia ŭ Nacyjanalnaj akademii ŭnutranych spraŭ Ukrainy.
U vyniku analizu akaŭntaŭ bajcoŭ mikałajeŭskaha «Bierkuta» i supastaŭleńnia z vydalenymi Siarhiejem Panasienkam kantaktami byli znojdzienyja jašče dva profili Anatola Prymaka, adzin ź jakich padpisany psieŭdanimam «Stanisłav Siemieniuk» i na siońnia aktyŭny.
Paśla publikacyi ŭ 2017 hodzie infarmacyi pra vyjaŭlenych u Biełarusi «bierkutaŭcaŭ» hety akaŭnt byŭ začyščany, ź jaho vydaleny piersanalny fotazdymak Prymaka, šmatlikija dopisy, a sa śpisu siabroŭ — praktyčna ŭsie akaŭnty supracoŭnikaŭ MUS RB. Adnak papiaredniuju viersiju akaŭnta ŭdałosia adšukać u kešy rasijskaj pošukavaj sistemy «Jandieks».
Adzin z užo vydalenych dopisaŭ u stužcy hetaha akaŭnta Anatol Prymak zrabiŭ 19 studzienia 2017 hoda. U im jon źmiaściŭ supolny fotazdymak udzielnikaŭ spartovych spabornictvaŭ.
Jak akazałasia, heta byŭ čempijanat pa rukapašnym bai siarod supracoŭnikaŭ minskaj milicyi, jon pravodziŭsia ŭ studzieni 2017 hoda. Druhoje miesca ŭ samaj ciažkoj vahavoj katehoryi (bolš za 90 kh) zdabyŭ bajec minskaha AMAPa Anatol Prymak, pisali «SB. Biełaruś siehodnia» i sajt BFST «Dynama». Hetyja infarmacyjnyja resursy padali i fotazdymki sa zhadanaha čempijanatu. Adzin ź ich amal identyčny fota, vykładzienamu Prymakom u svaim akaŭncie, tolki zrobleny ź inšaha rakursu.
Vyznačana, što Anatol Prymak — udzielnik pablika «Politika| PMOP «Bierkut» opłot spokojstvija strany». U traŭni 2016 hoda administracyja hetaha pablika, kab vyśvietlić, chto siarod jaho ŭdzielnikaŭ źjaŭlaŭsia bajcom «Bierkuta», źmiaściła admysłovaje apytańnie. Na jaho adkazaŭ i Anatol Prymak, jaki paznačyŭ, što słužyć u śpiecyjalnym uzvodzie AMAPa.
Taksama proźvišča hetaha mikałajeŭskaha «bierkutaŭca» fihuravała 6 sakavika 2020 hoda ŭ spravie razhladu sudom Centralnaha rajona Minska administracyjnaj spravy hramadskaha aktyvista i anarchista Mikałaja Dziadka za ŭdzieł u akcyi «Svabodu palitviaźniam» 26 lutaha hetaha ž hoda ŭ Minsku. Prymak byŭ vyklikany na sud u jakaści śviedki razam ź inšym supracoŭnikam AMAPa, adnak na pasiadžeńnie nie pryjšoŭ — nibyta praz chvarobu.
Dźmitryj Ancupaŭ
U pole zroku žurnalistaŭ trapiŭ jašče adzin tavaryš pa słužbie, eks-bajec śpiecpadraździaleńnia «Bierkut» Dźmitryj Ancupaŭ. Jon byŭ vyjaŭleny siarod kantaktaŭ bajcoŭ mikałajeŭskaha «Bierkuta», a taksama dziejnych supracoŭnikaŭ palicyi Ukrainy, jakija paznačyli jaho ŭ jakaści svajho kalehi.
Naradziŭsia jon u 1975 hodzie ŭ Volsku Sarataŭskaj vobłaści. Pražyvaŭ u Mikałajevie. Paśla pieramohi revalucyi Hodnaści staŭ aficeram novaj śpiecroty milicyi, sfarmiravanaj z kolišnich «bierkutaŭcaŭ». Mierkavana, viasnoj ci letam 2014 hoda ŭciok u Biełaruś. Słužyć u AMAP UUS Minskaha abłvykankama.
Dźmitryj Ancupaŭ byŭ vyjaŭleny i identyfikavany na supolnych fotazdymkach jaho tavaryšaŭ pa słužbie ŭ «Bierkucie».
Upieršyniu pra jaho jak supracoŭnika biełaruskaj milicyi napisała «SB. Biełaruś siehodnia». Publikacyja była pryśviečana naradzie va UUS Minskaha abłvykankama, što adbyłasia ŭ lipieni 2018 hoda i była prymierkavanaja da padsumavańnia vynikaŭ pracy abłasnoha atrada milicyi asablivaha pryznačeńnia za pieršaje paŭhodździe. Eks-«bierkutaviec» Dźmitryj Ancupaŭ identyfikavany ŭ apublikavanym fotazdymku z hetaj narady.
Aproč hetaha, Dźmitryj Ancupaŭ byŭ zafiksavany ŭ siužecie «STV» pra zdaču ispytu na prava našeńnia čornaha biereta bajcami AMAPa, jaki prachodziŭ 20 listapada 2019 hoda. Siužet apublikavany na videachostynhu YouTube. u epizodzie z kamientarom amapaŭca Ivana Kudzina na zadnim płanie levaruč možna pabačyć čałavieka ŭ cyvilnym, što razam ź inšymi naziraje za sparynham bajcoŭ AMAPa i azirajecca nazad, niby analizujučy abstanoŭku.
Kolkaść vyjaŭlenych bajcoŭ «Bierkuta» ŭ Biełarusi — nie kančatkovaja, aŭtary rasśledavańnia abiacajuć apubličyć novyja imiony.