3 śniežnia ŭ sudzie Śvietłahorskaha rajonu raspačaŭsia razhlad kryminalnaj spravy pa «masavych biesparadkach», abo «arhanizacyi hrupavych dziejańniaŭ, jakija hruba parušajuć hramadzki paradak i źviazanyja ź niepadparadkavańniem patrabavańniam pradstaŭnikoŭ ułady» (artykuł 342 Kryminalnaha kodeksu), piša Radyjo Svaboda.
Abvinavačvajecca ŭ kryminale 29-hadovy Siarhiej. 11 žniŭnia jon pakinuŭ niekalki dopisaŭ u telehram-čacie «Śvietłohorsk dla žiźni». Tam byli parady, jak supraćdziejničać milicyi na akcyjach. Pa versii abvinavačańnia, žychar Śvietłahorsku «arhanizavaŭ rekamendacyi i instrukcyi, schilaŭ hramadzian da ŭdziełu ŭ hrupavych dziejańniach, jakija hruba parušajuć hramadzki paradak u čas praviadzieńnia niesankcyjanavanych mierapryjemstvaŭ».
Abvinavačany raiŭ pratestoŭcam źbiracca ŭ peŭnym miescy, abjadnoŭvacca ŭ hrupy, blakavać ruch transpartu na skryžavańniach, arhanizoŭvać pastki i zatrymańni supracoŭnikaŭ milicyi, zdymać ź ich formu, źviazvać ruki i nohi ściažkami ci skotčam.
Sam jon udziełu ŭ niesankcyjanavanaj akcyi nia braŭ, a parady pisaŭ z rabočaha miesca ŭ Mazyry.
Žychar Śvietłahorsku pryznaŭ svaju vinu i padrabiazna patłumačyŭ svaje dziejańni. Pavodle jahonych słovaŭ, 11 žniŭnia jon čytaŭ naviny, u tym liku ŭ telehram-kanale «Śvietłohorsk dla žiźni». Jaho aburyła žorstkaść milicyjantaŭ pry zatrymańni ludziej u Miensku.
«U čacie pisali mnohija. Spačatku ja pisaŭ, što nia varta prymianiać siłu da milicyjantaŭ. Ale mnie pačali kazać, što vykinuć mianie z čatu — a dzie mnie hladzieć naviny pa horadzie? Tam byli ludzi, jakija padbuchtorvali da roznych dziejańniaŭ. Byŭ čałaviek, jaki pradstaviŭsia milicyjantam i napisaŭ, što jany abaraniajuć nie narod, a krainu — ad takich, jak my. Mianie heta aburyła. Ja pačaŭ taksama pisać pra roznyja varyjanty i metady supraćstajańnia. Heta byŭ nia zaklik da dziejańniaŭ, a majo mierkavańnie. Ja bajaŭsia, što ŭ našym horadzie taksama buduć žorstka źbivać ludziej, jak u Miensku», — tłumačyŭ abvinavačany.
Jon paćvierdziŭ, što pisaŭ pra toje, što milicyjantaŭ možna źviazać i formu źniać ź ich.
«Heta ŭsio było na emocyjach. U mianie padnialisia nervy. U čacie inšyja ludzi padbuchtorvali, tolki potym ja zrazumieŭ, što tam byli pravakatary. U čacie ŭsio było stychijna, šmat paviedamleńniaŭ išło. Kožny vykazvaje svaju złość, i ty ŭ hety kłubok traplaješ i ŭžo nie kantraluješ. Meta i pryčyna… Nasamreč u mianie nie było mety, kab ludzi pačali deboš. Ja metu mieŭ, kab jak najmienš ludziej atrymali traŭmy, kab mienš ich zatrymlivali. Ja dzialiŭsia svajoj dumkaj. Tłumačyŭ, što heta (hvałt. — RS) moža pracavać u dva baki», — kazaŭ Siarhiej.
Słuchańnie spravy praciahniecca 11 śniežnia.
Pa častcy 1 artykuła 342 Kryminalnaha kodeksu abvinavačanamu pahražaje štraf, aryšt, abmiežavańnie ci pazbaŭleńnie voli da troch hadoŭ.
