Skrynšot ź videa Hrodzienskaj milicyi

Skrynšot ź videa Hrodzienskaj milicyi

Śledčyja orhany i prakuratura Biełarusi paviedamlajuć pra ŭsio novyja fakty błakavańnia ruchu čyhunačnaha transpartu šlacham nakładańnia mietaličnaha drotu na rejki, psavańnia sihnalizacyi i inšych kryminalnych dziejańniaŭ na čyhuncy, piša spring96.org.

Rabotniki Ašmianskaha RAUS i AUS na transparcie ŭstanavili asobu 27-hadovaha mužčyny, jakoha padazrajuć u paškodžańni mahistralnaha kabielu na čyhuncy. Incydent zdaryŭsia 11 listapada na pierahonie «Ašmiany—Hudahaj».

Śledstvam było ŭstanoŭlena, što žychar Ašmianaŭ, hramadzianin K. pierarezaŭ kabiel nažoŭkaj. Taksama karystaŭsia pry hetym łomam i rydloŭkaj.

U dačynieńni da žychara Ašmianaŭ raspačata kryminalnaja sprava pa artykule 309 Kryminalnaha kodeksa (naŭmysnaje pryviadzieńnie ŭ niepryhodnaść transpartnaha srodku abo šlachoŭ znosin). Jamu moža pahražać da troch hadoŭ pazbaŭleńnia voli. Raniej mužčyna da kryminalnaj adkaznaści nie pryciahvaŭsia.

U paniadziełak, 7 śniežnia, u Baranavičach byli zatrymanyja troje miascovych žycharoŭ, jakich źmiaścili ŭ izalatar časovaha ŭtrymańnia. Ich padazrajuć ŭ ździajśnieńni złačynstva pa artykule 309 Kryminalnaha kodeksa. Akaličnaści zdareńnia vyśviatlajucca.

U Śvietłahorsku niadaŭna taksama była ŭzbudžanaja kryminalnaja sprava pa art. 309 KK RB. U miežach jaje homielskija apieratyŭniki (HuBAZ) zatrymali hramadzianina B. Viadoma, što sprava źviazanaja z dvuma vypadkami naciažeńnia drotu na čyhuncy ŭ listapadzie.

Mužčyny z Radaškovičaŭ nakłali mietaličny drot na čyhunku. Ich złavili milicyjaniery. Zatrymanyja skazali, što źbiralisia raźlić bienzin na šlachu adychodu, dumajučy, što takim čynam zmohuć źbić sa śledu słužbovaha sabaku. Ciapier mužčyny znachodziacca ŭ izalatary časovaha ŭtrymańnia. Śledčyja raspačali kryminalnuju spravu za naŭmysnaje pryviadzieńnie ŭ nieprydatnaść šlachoŭ znosin.

Raniej paviedamlałasia, što ranicaj 12 listapada supracoŭniki milicyi ŭ miežach kryminalnaj spravy nibyta za psavańnie sihnalizacyi na čyhuncy pryjšli ź pieratrusam da bieraściejca Alaksandra Bułyhi. Zaraz jon zatrymany, idzie śledstva.

Pravaabaroncam viadomaja infarmacyja pra zatrymańnie muža i žonki Siarhieja i Volhi Silič. Pavodle papiaredniaj infarmacyi, jany padazrajucca ŭ psavańni čyhunačnaj sihnalizacyi pa č. 1 art 309 KK RB. Pravaabaroncy kažuć pra toje, što z zatrymanych vybivali pakazańni z dapamohaj fizičnaj siły i katavańniaŭ.

Volha Silič vyjšła z Bresckaha SIZA pad abaviazacielstva ab jaŭcy ŭviečary 23 listapada, praź niekalki hadzin paśla taho, jak videa z pryznańniami jaje muža Siarhieja było apublikavana na YouTube-kanale MUS. Siarhiej usio jašče znachodzicca pad vartaj. Ź im sustrakaŭsia advakat.

— Pakul abvinavačańnie nie pradjavili. Tolki rolik milicyja vypuściła. Pry zatrymańni ŭžyvali siłu. Kali advakat pryjšła da jaho, jon byŭ prykavany kajdankami. Jana paprasiła vyklikać chutkuju. Chutkaja jaho ahledzieła, što choć by niama pierałomaŭ. Praź dzień chutkuju jamu znoŭ vyklikali ŭ izalatar, tamu što vielmi baleła śpina. Na špitalizacyju jaho nie vieźli, — cytavaŭ słovy Taćciany TUT.BY.

Ale padobna na toje, što psavańnie čyhunačnych šlachoŭ i kamunikacyj nie abmiažoŭvajecca tolki dziejańniem artykuła 309.

Varta nahadać, što na naradzie pa padrychtoŭcy šostaha Usiebiełaruskaha narodnaha schoda Alaksandr Łukašenka źviarnuŭ uvahu na toje, što ludzi «ŭžo vyjšli na čyhunku i pačynajuć błakavać aŭtamatyku, ažyćciaŭlać zamykańnie rejek. Heta moža pryvieści da surjoznych avaryj na čyhuncy, katastrof i hibieli mnostva ludziej. Heta dziejańni arhanizavanych złačynnych hrup z prykmietami teraryzmu».

Tak, pa infarmacyi Hienieralnaj prakuratury, 7 śniežnia kala čyhunačnaj stancyi Adamava ŭ Połackim rajonie znajšli «pradmiet z prykmietami samarobnaj vybuchovaj pryłady». Na bolš čym piać hadzin byŭ zatrymany ruch piaci ciahnikoŭ — dvuch pasažyrskich i troch hruzavych.

Prakuror Viciebskaj vobłaści Vadzim Suščynski raspačaŭ kryminalnuju spravu ab pahrozie ździajśnieńnia aktu teraryzmu, jakaja paciahnuła inšyja ciažkija nastupstvy (č. 2 art. 290). Papiaredniaje rasśledavańnie budzie vieści KDB.

Jak traktuje Kryminalny kodeks artykuł 309?

Artykuł 309. Naŭmysnaje pryviadzieńnie ŭ niepryhodnaść transpartnaha srodku abo šlachoŭ znosin

Častka 1. Naŭmysnyja razbureńnie, paškodžańnie abo pryviadzieńnie inšym sposabam u nieprydatny dla ekspłuatacyi stan srodkaŭ čyhunačnaha, vodnaha, pavietranaha, aŭtadarožnaha, mahistralnaha trubapravodnaha transpartu, šlachoŭ znosin, zbudavańniaŭ na ich, srodkaŭ sihnalizacyi abo suviazi, abo inšaha transpartnaha abstalavańnia, kali hetyja dziejańni zahadzia dla vinavataha mahli paciahnuć śmierć čałavieka, krušeńnie, avaryju albo inšyja ciažkija nastupstvy, — karajucca štrafam, abo aryštam, ci abmiežavańniem voli na termin da troch hadoŭ, abo pazbaŭleńniem voli na toj ža termin.

Pra krušeńni i inšyja ciažkija nastupstvy pakul ničoha nieviadoma, ale paviedamlajecca čamuści nie pra administracyjnyja, a kryminalnyja spravy.

Клас
0
Панылы сорам
0
Ха-ха
0
Ого
0
Сумна
0
Абуральна
0