Juryst Andrej Kosaŭ absłuhoŭvaje IT-kampanii. Jon žyvie ŭ Minsku, ale maje kvateru ŭ Hancavičach, jakaja zastałasia ad pamierłych baćkoŭ.
U pačatku śniežnia Andrej zajazdžaŭ u tuju kvateru. Paviesiŭ na bałkonie nacyjanalny bieła-čyrvona-bieły ściah z hierbam Hancavičaŭ. I pajechaŭ u Minsk na rabotu.
Praź niekalki dzion, u čaćvier, 10 śniežnia, jamu nabrali z hancavickaj milicyi i pacikavilisia, ci nie moh by jon padjechać pa hetym adrasie i adamknuć dźviery.
«Mnie skazali, što pavodle ananimnaha paviedamleńnia jość padstavy mierkavać, što ŭ hetaj kvatery ździejśniena zabojstva», — raskazaŭ «Našaj Nivie» Kosaŭ.
Mužčyna adkazaŭ, što nie moža pa hołasie identyfikavać rabotnikaŭ milicyi, i pakłaŭ trubku.
«Praź niekatory čas mnie pierazvanili, što kvatera ŭskrytaja na padstavie hetaha ananimnaha paviedamleńnia. Ślady zabojstva, naturalna, nie byli znojdzieny, ale na bałkonie znojdzieny bieła-čyrvona-bieły ściah. Jany traktujuć jak parušeńnie pa artykule 23.34, tamu mnie treba ŭ piatnicu źjavicca dla raźbiralnictvaŭ. Pozvu dasłali ŭ vajbier pozna ŭviečary, adnak pabačyŭ ja jaje tolki ŭranku», — kaža Kosaŭ.
Na nastupny dzień Kosaŭ patelefanavaŭ na telefon dziažurnaj častki Hancavickaha RAUS i ŭdakładniŭ, ci pracujuć u milicyi na samoj spravie asoby, zhadanyja ŭ poźvie.
Źjavicca ŭ Hancavičy da 12:00 jon nie moh, tamu skazaŭ milicyjanieram, što moža pryjechać u paniadziełak. Hutarka skončyłasia na tym, što daručeńnie pravieści apytańnie pieradaduć miascovym supracoŭnikam u Minsk pa miescy žycharstva, i jon daść tłumačeńni tut.
U vyniku, «spravu pieradali» — Kosavu pazvaniŭ nibyta ŭčastkovy ź minskaj «aporki», paprasiŭ padyści i dać tłumačeńni. Ale kali Kosaŭ pryjšoŭ, jaho zatrymali supracoŭniki Hancavickaha RAUS i advieźli ŭnačy ŭ Hancavičy. Tam Kosaŭ troje sutak čakaŭ suda.
«Śviedkam vystupaŭ načalnik adździeła ideałohii miascovaha vykankama Viktar Suprun, jaki pabačyŭ ściah z vulicy. Akazałasia, što pieršapačatkovyja słovy pra zabojstva ŭ kvatery — tolki fantazii niejkaha «nieviadomaha». U realnaści kvatera ŭskryvałasia, bo isnavała padazreńnie, što ŭ joj moža adbyvacca «niesankcyjanavany schod pa padrychtoŭcy da masavaha mierapryjemstva», — kaža Kosaŭ.
Kvateru ŭskryvali biez papiaredniaj sankcyi prakurora, a rašeńniem kiraŭnika miascovaj milicyi z uviedamleńniem prakurora postfaktum.
Staršynia Hancavickaha suda Uładzimir Kosmač pryznaŭ Kosava vinavatym i daŭ jamu 10 bazavych štrafu.
Adrazu paśla suda na minskaha jurysta zaviali jašče adzin pratakoł — za niajaŭku pa poźvie. Toj ža sudździa pry razhladzie spravy praz tydzień abmiežavaŭsia papiaredžańniem.
Admietna, što dniami Kosmač pa ŭłasnym žadańni syšoŭ u adstaŭku z pasady staršyni suda. Adnak naŭrad ci hetyja historyi źviazanyja — takija ŭkazy rychtujucca davoli doŭha.
