87-hadovuju Lizavietu Bursavu pakarali za vyviešany na bałkonie bieł-čyrvona-bieły ściah. Na žančynu skłali pratakoł «za pikiet» pa artykule 23.34.
15 śniežnia ŭ sudzie Kastryčnickaha rajona prajšło karotkaje pasiadžeńnie.
Spravu razhladaŭ sudździa Alaksandr Rudenka.
«Pieršy raz mianie sudziać — za 87 hadoŭ!» — paviedamiła babula, uvajšoŭšy ŭ zału suda.
Padtrymać jaje pryjšli dvoje synoŭ Jaŭhien i Kanstancin, unučka Maryja, žurnalisty, prosta nieabyjakavyja ludzi — ahułam kala 20 čałaviek.
Nahadajem raźvićcio padziej. Ściah, jaki visieŭ na bałkonie, 29 listapada siamja źniała na ŭsiaki vypadak, bo ŭ toj dzień zatrymali Jaŭhiena, małodšaha syna Lizaviety Jakaŭleŭny.
Ale heta nie ŭratavała ad prablem. Na nastupny dzień syn atrymaŭ 15 sutak, a ŭ kvateru da Bursavaj pryjšoŭ milicyjant z fotazdymkam: u vas visieŭ ściah, składajem pratakoł.
Ciapier los «pravaparušalnicy» vyrašaŭ sud.
«13 listapada Bursava praviała masavaje mierapryjemstva — pikietavańnie šlacham raźmiaščeńnia ściaha bieła-čyrvonych koleraŭ», — začytaŭ sudździa Rudenka pratakoł.
Z pratakołam Lizavieta Jakaŭleŭna nie pahadziłasia: patłumačyła, što pad hetym ściaham Łukašenka prysiahu davaŭ.
Ale što ściah visieŭ, pahadziłasia: «Vyviešvała, kab było vidać, za kaho ja hałasavała».
Usio pra ŭsio — 5 chvilin. Zatym paŭhadziny pierapynku na vyniasieńnie pastanovy.
U pierapynku Lizavieta Jakaŭleŭna pahavaryła z prysutnymi: raspaviała, što lubić Biełaruś i źjazdžać nikoli nie chacieła, adkazała na pytańni pra maładość i vajnu, skazała, što zaŭsiody ličyła Łukašenku papulistam, i što nie razumieje, jak jaje možna sudzić za ściah.
Adzin z prysutnych navat paprasiŭ sfatahrafavacca z Bursavaj. Taja nie admoviła.
Sudździa Rudenka vyrašyŭ, što piensijanierka vinavataja ŭ pikiecie. Vyrak — štraf 15 bazavych (405 rubloŭ).
«A apošniaje słova nie daduć skazać?» — ździviłasia Bursava, ale sudździa Rudenka ŭžo vyjšaŭ z kabinieta.