fly-uni.org

fly-uni.org

Viadomy biełaruski ekanamist i člen asnoŭnaha składu Kaardynacyjnaj rady Dźmitryj Kruk u paniadziełak vyjšaŭ na svabodu paśla 15 sutak administracyjnaha aryštu. Jon raspavioŭ Tut.by ab praviedzienych u niavoli dniach, unutranym supraćstajańni źnievažalnym mietadam i vysnovach, jakija zrabiŭ z horkaha vopytu.

Rašeńnie suda nie stała siurpryzam

Zatrymali Dźmitryja Kruka ŭ niadzielu, 29 listapada, u adnym z spalnych rajonaŭ stalicy, na nastupny dzień jaho sudzili za ŭdzieł u niesankcyjanavanym masavym mierapryjemstvie. Niahledziačy na supiarečnaści ŭ pakazańniach adzinaha śviedki i tłumačeńni samoha Dźmitryja, a taksama na adsutnaść jakich-niebudź dokazaŭ ździejśnienaha pravaparušeńnia, jamu prysudzili 15 sutak administracyjnaha aryštu. Historyja nie novaja dla apošnich čatyroch miesiacaŭ, kaža Dźmitryj Kruk, tamu jana i nie vyklikała ździŭleńnia.

— Adnatypnyja rašeńni pa takich spravach vynosiacca nie pieršy miesiac. I zasakrečanyja śviedki pad kapirku kažuć, što jany bačyli, apaznajuć ludziej va ŭmovach, jakija vyhadnyja dla hetych śviedak, heta daŭno nie navina ŭ nas u krainie. A frazu, jakaja hučyć na sudach, što niama padstaŭ nie daviarać śviedku, jaki źjaŭlajecca supracoŭnikam milicyi, užo ŭ nas na jazyki ŭziali. Ja dastatkova dobra razumieŭ, što ŭsio hetak ža budzie i ŭ maim vypadku, tamu dla mianie ŭsio było pradkazalna i vialikich iluzij, što ŭsio budzie razhladacca pa faktach, jak naležyć pa zakonie, nie było.

Ekanamist uspaminaje, što niekatoryja, kaho jon sustreŭ za 15 sutak, byli ŭražanyja tym, što adbyvajecca, i da kanca spadziavalisia, što pravaachoŭnyja orhany raźbiarucca ŭ ich situacyi, vyśvietlicca nieparazumieńnie i ich nieŭzabavie adpuściać. Ich usich čakała rasčaravańnie.

Viedajučy karcinu pa pryniatych rašeńniach pa artykule 23.34 KaAP, ekanamist razumieŭ, što paśla suda najbolš vierahodny šlach — na «sutki». Pytańnie stajała tolki ŭ ich kolkaści.

— Vielizarnaja kolkaść ludziej u takoj ža situacyi pabyvała. U takoj situacyi moža akazacca luby, tamu z momantu, jak ja apynuŭsia ŭ aŭtazaku, ja ćviaroza analizavaŭ situacyju, — kamientuje ekśpiert BEROC svajo staŭleńnie da zatrymańnia.

Fizičnaha hvałtu jak pry zatrymańni, tak i paśla, kaža Dźmitryj Kruk, da jaho nie ŭžyvali, kali nie ličyć hrubaha šturchańnia pry ŭvachodzie ŭ aŭtazak. Adnak jon adznačyŭ, što maniera zvarotu zatočanaja na zapałochvańnie i ŭviadzieńnie zatrymanych u stan stresu.

— Kryki, łajanka i da taho padobnaje. Heta robicca śviadoma. Kali čałaviek znachodzicca ŭ stresavym stanie, u jaho, naturalna, dušycca vola, jon pierastaje racyjanalna dumać. Hałoŭnaja rada: pieršapačatkova heta razumieć i sprabavać paźbiehnuć stresu, u jaki ciabie ŭhaniajuć.

Pach mačy ŭ kamiery i BČB-ściah na padłozie aŭtazaka

Jak i rašeńnie suda, śviet, kudy traplajuć adbyvać administracyjny aryšt, dla ekanamista nie staŭ adkryćciom. Tysiačy čałaviek prajšli praz heta tolki pa adnym papularnym u 2020 hodzie artykule, napeŭna jość sotni padobnych adna da adnoj historyj adbyćcia aryštu. Važna, kaža surazmoŭca, było prykłaści ŭsie namahańni, kab nie ŭpaści ŭ stres i depresiju.

— Adzinaje, što adpiačatałasia ŭ pamiaci, — heta kamiera z pacham mačy, jaki ŭvabraŭsia va ŭsio: ad nar da matracaŭ, — uspaminaje Kruk pieršy čas, jaki pravioŭ na Akreścina.

Vyprabavaŭ na sabie člen KR i viadomy mietad pieravozki z RUUS na Akreścina, kali ludziej nabivajuć, jak sieladca ŭ kansiervavyja banki.

— Nie viedaju, na kolki taki stakan raźličany, padobna, što na adnaho čałavieka. Nas ža tudy ŭpichnuli traich. Adzin chłopiec stajaŭ u pozie litary «ziu». Dumaju, heta taksama robicca śviadoma. Z Akreścina ŭ Žodzina ŭžo narmalna pieravozili. Ale i tut taksama kryčać z usich bakoŭ: «Davaj!», «Pajšoŭ!», «Nie stajać!», «Mordu ŭniz!» Zadača ŭ tym, kab čałaviek nie moh dumać, bajaŭsia i padparadkoŭvaŭsia.

Atmaśfiera stresu padtrymlivajecca i ŭ Žodzinie, ličyć Dźmitryj, i ŭspaminaje jašče adzin z samych dziŭnych i niezrazumiełych mietadaŭ uździejańnia na tych, kaho pryznali pravaparušalnikami, — heta zasłanyja bieł-čyrvona-biełymi ściahami ŭvachody ŭ aŭtazaki i ŭ adzin z kabinietaŭ u Žodzinie.

— Ja abychodziŭ ich usiudy. Ale adzin raz za heta mianie šturchanuli ŭ śpinu, kab mnie pryjšłosia [nastupić na ściah]. Ludzi ličać, što heta chitry chod. Jak ja ŭžo skazaŭ, napeŭna, hienieralnaja ideja — prynizić, zapałochać čałavieka. Uvieś hety kompleks mierapryjemstvaŭ na heta i nakiravany.

Hienieralnaja ideja — prynizić čałavieka, ale efiekt atrymlivajecca advarotnym

— U mianie heta pieršy dośvied sutyknieńnia ź pienitencyjarnaj sistemaj. Ale ŭsie, chto tam byŭ, nieadnarazova kazali, što sistema nacelenaja na toje, kab rastaptać čałaviečuju hodnaść, pakarać, pastavić u situacyju «niedačałavieka». Adčuvajecca, što dla «palityčnych» heta robicca metanakiravana, — kaža Dźmitryj Kruk. — Inšaje pytańnie, što hetaja meta nie dasiahajecca. Ty razumieješ, što sistema zatočanaja na toje, što jana sprabuje pieratvaryć čałavieka ŭ ništo, ale adbyvajecca ŭsio naadvarot. U kamierach — pabudova haryzantalnych suviaziaŭ, umacavańnie duchu. Tamu sproby prynizić i rastaptać vyhladajuć karykaturna. Da ich možna stavicca tolki z horkim sarkazmam i ironijaj.

Nie byŭ by analityk takim, kali b ź luboha vopytu nie vynosiŭ hłabalnych vysnoŭ. Paśla 15 sutak u niavoli Dźmitryj Kruk stavić usiamu tamu, što adbyvajecca, niesuciašalny dyjahnaz: «Sistema pačynaje źjadać sama siabie».

— Heta adbyvajecca vielmi chutka. I nakolki ja razumieju, šrubki hetaj sistemy čaściakom razumiejuć, što ich realnaść ściskajecca i jeść sama siabie.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?