5 maja 2020 hoda dapamožny biskup Pinskaj dyjacezii Kazimir Vielikasielec, a ciapier časovy kiraŭnik katalickaha kaścioła ŭ Biełarusi, adznačaŭ svajo 75-hodździe. Heta najstarejšy ijerarch sučasnaha katalickaha kaścioła ŭ Biełarusi, paviedamlaje Vatican News.
Tadevuš Kandrusievič pamiataje svajo znajomstva z Kazimiram Vielikasielcam. Heta było ŭ 1980-ch hadach u Vilni. U toj čas małady śviatar Tadevuš Kandrusievič słužyŭ u kaplicy Vostrabramskaj Maci Božaj, a Kazimir Vielikasielec — pracavaŭ zvarščykam na budaŭnictvie ŭniviermaha ŭ Vilni i prychodziŭ na sv. Imšu. I ŭžo tady — vučyŭsia ŭ padpolnaj duchoŭnaj sieminaryi. Čas byŭ ciažki, nie chapała knih, tamu Kazimir prasiŭ u ks. Tadevuša litaraturu dla navučańnia. Tak i pasiabravali.
Kazimir Vielikasielec naradziŭsia 5 maja 1945 h. u vioscy Staravola Pružanskaha rajona ciapierašniaj Bresckaj vobłaści ŭ siamji sialan. Užo ŭ 1948 h. parafijalny kaścioł tut začynili, śviatara aryštavali. Ale dziakujučy hłybokaj viery baćkoŭ, Kazimir ź dziacinstva byŭ pryvučany da malitvy. Da pieršaj spoviedzi i sv. Kamunii chłopčyka rychtavaŭ baćka. I ŭ 10-hadovym uzroście advioz jaho na rovary ŭ bližejšy kaścioł u Kobryn — heta 60 km u adzin bok. Kazimir Vielikasielec pamiataje, jak u dźvie hadziny nočy baćka pasadziŭ jaho pobač na rovar, da 8 ranicy jany byli ŭ Kobrynie. Tam śviatar pryniaŭ ispyt u Kazimira, dapuściŭ jaho da pieršaj spoviedzi i Kamunii. Nazad dadomu — taksama 60 kiłamietraŭ na rovary.
Siamja słuchała pa radyjo sv. Imšu na polskaj movie. U junactvie Kazimir vyvučyŭ na pamiać Litaniju da Najśviaciejšaj Panny Maryi. I, kali jaho pryzvali ŭ vojska, čytaŭ jaje štodnia: kali zaściłaŭ łožak ranicaj ci kali kłaŭsia spać paśla adboju. Kožnuju niadzielu zamiest Eŭcharystyi maliŭsia na Ružancy. Darečy, ciapier biskup Kazimir štodnia molicca ŭsie čatyry častki Ružanca, a taksama razvažaje Kryžovy šlach.
Paśla vojska jon adpraviŭsia pracavać na budoŭlu ŭ Vilniu. Tam ža paznajomiŭsia z bratami-daminikancami, u dalejšym prynios u ordenie pieršyja manaskija šluby. Try hady ŭłady nie davali Kazimiru mahčymaść pastupić u Ryžskuju sieminaryju. Viarnuŭšysia ŭ BSSR, u kanśpiracyi jon rychtavaŭsia da pastupleńnia. Dvojčy jeździŭ u Maskvu z prośbaj dazvolić jamu pastupić u sieminaryju. U vyniku damohsia hetaha dazvołu i ŭ 1981 h. byŭ pryniaty ŭ Ryžskuju sieminaryju adrazu na treci kurs.
Biskup Kazimir uzhadvaje, što pieršapačatkova jon chacieŭ pastupać u miedycynski instytut, padaŭ tudy dakumienty, ale praciahvaŭ sumniavacca ŭ paklikańni. Adnojčy padčas pilihrymki da abraza Maci Božaj u Šyłuvie pačuŭ zaklik pastupać u sieminaryju.
Adrazu paśla zakančeńnia sieminaryi śviatar absłuhoŭvaŭ piać parafij — heta značyć, što ŭ niadzielu treba było słužyć piać sv. Imšaŭ. Cikava, što hetyja parafii byli ŭ pamiežnych vioskach i miastečkach Brestčyny, Hrodzienščyny i Minščyny. Atrymlivajecca, što za adzin dzień jon byvaŭ adrazu ŭ troch abłaściach. Akramia pastyrskaha słužeńnia, zajmaŭsia restaŭracyjaj i ramontam śviatyniaŭ. U cełym, adkryŭ abo adnaviŭ pracu kala dziesiaci parafij.
U 1992 h. Kazimira Vielikasielca pryznačyli Hienieralnym vikaryjem Pinskaj dyjacezii, u 1999 h. atrymaŭ biskupskuju sakru.
