Cisk biełaruskich uładaŭ na hramadzianskuju supolnaść praciahvajecca, i kryzis nikudy nie źnik. Pra heta zajaviŭ u intervju «Hołasu Amieryki» staršynia Pravaabarončaha centra «Viasna» Aleś Bialacki.
Na jaho pohlad, niekatoryja ludzi «zatailisia», ale, tym nie mienš, «usploski hramadzianskaj niezadavolenaści prajaŭlajucca paŭsiudna, a niadzielnyja akcyi pratestu nie spynilisia».
«Moža być, ich masavaść niekalki źniziłasia z-za represij. Paśla zatrymańnia ludziej źbivajuć, naŭmysna zaražajuć kavidam, kali zapichvajuć u adnu kamieru i chvorych, i zdarovych», — miarkuje Bialacki.
Jon taksama adznačyŭ, što ŭłady dahetul nie raspačali nivodnaj kryminalnaj spravy ŭ suviazi sa złačynstvami siłavikoŭ, choć «jość tysiačy zafiksavanych faktaŭ», pry hetym «ździeki ŭ dačynieńni da zatrymanych aktyvistaŭ praciahvajucca».
Staršynia PC «Viasna» pierakanany, što heta adbivajecca na aktyŭnaści ludziej.
«U tym liku vielmi niehatyŭna i naściarožana ŭsprymajucca kroki Pucina pa padtrymcy Łukašenki, — padkreśliŭ jon. — Staŭleńnie ludziej, jakija dumajuć, da Rasii vielmi mocna źmianiłasia. Maskvu ŭsprymajuć jak palityčnuju siłu, jakaja padtrymlivaje Łukašenku. Nu a siabar majho voraha mnie taksama vorah. Idzie vialikaje astudžeńnie. Tym bolš u kantekście infarmacyi pa Navalnym».
Ciapier u Biełarusi ŭsio bolš vostra i krytyčna ŭsprymajecca toje, što robicca rasijskaj uładaj, ličyć Aleś Bialacki.
«Jasna, što rasijskija telekanały pa-raniejšamu pracujuć, i časam niebiespaśpiachova, jak prapahandysckaja zbroja. Ale ŭ toj ža čas značnaja častka nasielnictva demanstruje ćviarozaść dumki», — adznačyŭ pravaabaronca.
Tyja, chto raniej mała ab čym zadumaŭsia, ciapier staviacca da Rasii jak da patencyjnaj pahrozy, jakaja moža spynić demakratyčnaje stanaŭleńnie Biełarusi, reziumavaŭ staršynia pravaabarončaha centra «Viasna».
